Compostela, 24 de novembro do 2023 – A Universidade de Santiago de Compostela, USC, e a Fundación Granell organizan os “Encontros Americanos na Granell”.
Os Encontros Americanos na Granell teñen como fin ofrecer un espazo aberto de diálogo, ideas, debate e reflexión ao redor de América a través dun programa de conferencias mensuais que abordarán temas culturais, políticos, sociais, económicos ou de actualidade, de interese público e carácter divulgativo.
Os Encontros terán lugar na Fundación Eugenio Granell, organizados polo Grupo de Historia de América (HistAmérica) da USC, e cofinanciados pola Vicerreitoría de Estudantes e Cultura a través da súa convocatoria de axudas de dinamización cultural.
Os seus participantes serán especialistas procedentes do ámbito académico americano, español ou europeo, así como profesionais vencellados á realidade da rexión nas súas múltiples facetas.
Pasado e presente da economía cubana (1959-2023)
O primeiro de estes encontros terá lugar o vindeiro martes día 28, as sete da tarde. Co motivo do centenario do nacemento de Regino Boti, ministro de economía no goberno cubano nado da Revolución e testemuña privilexiada dos enfrontamentos que deron lugar á invasión da Praia Girón en 1961, a mesa redonda aborda a evolución económica de Cuba desde o momento no que se efectuaron, de acordo coas propostas de CEPAL, os primeiros intentos para industrializar o país ata a actualidade, deténdose nos principais momentos de cambio e nos posibles escenarios que se debuxan cara ó futuro.
Na charla participarán Manuel de la Iglesia Caruncho un economista, politicólogo e escritor e que traballou durante quince anos coa Cooperación Española en América Latina. José Antonio Alonso Rodríguez, Catedrático de Economía Aplicada na Universidade Complutense de Madrid, prolífico autor no seu campo, ocupou postos de responsabilidade académicos, institucionais (Cooperación Española) e internacionais, como membro do Committee for Development Policy de Nacións Unidas, entre outros. Finalmente estará Liliam Mariana Boti Llanes, avogada cubana, filla de Regino Boti, amplamente coñecedora da obra do seu pai e da súa transcendencia política e institucional.
