Será impartida polo investigador Miguel Anxo Fernán Vello dentro do ciclo “A vangarda arrebatada” sobre a vida e a obra de Francisco Miguel, e Syra Alonso.
A Fundación Eugenio Granell segue coa súa tarefa de divulgación cunha nova charla dentro do ciclo “A vangarda arrebatada” sobre a vida e a obra de Francisco Miguel, e Syra Alonso, organizadas pola Deputación da Coruña e a Asociación pola Recuperación da Memoria Histórica (ARMH).
A charla terá lugar este mércores 17 as sete da tarde na Granell baixo o título “Francisco Miguel, vida, arte e crime”. Miguel Anxo Fernán Vello, escritor, investigador e editor, será o poñente de esta cita. A presentación correrá a cargo de David Lozano da Asociación pola Recuperación da Memoria Histórica.
O pintor FRANCISCO MIGUEL (A Coruña, 1897- Bértoa, Carballo, 1936) foi unha figura central na arte galega das primeiras décadas do século XX. O traballo artístico de Francisco Miguel desenvólvese entre finais dos anos 1910 e 1936, ano do seu asasinato. Ligado ao núcleo coruñés que dará orixe á revista Alfar, a evolución da súa plástica vai levalo desde uns inicios vangardistas até o mundo da figuración tan característica da arte europea de entreguerras.
Nas súas viaxes por Europa e América tivo relación cos mais importantes artistas do momento. Detido tras o golpe de xullo de 1936, foi asasinado polos sublevados fascistas.
Non so enterraron o seu corpo senón tamén a súa arte.
Exhumado o seu corpo no ano 2023 pola Asociación para A Recuperación da Memoria Histórica, celebrarase a homenaxe e acto de entrega do corpo, e enterro no cemiterio de San Amaro, o luns día 29 de setembro nun acto cívico e aberto á cidadanía. Esta charla vai servir para difundir e recuperar esta vangarda arrebatada.
Miguel Anxo Fernán Vello
Poeta, dramaturgo, pintor e editor, fundador e director de Edicións Espiral Maior. Realizou estudos de Psicoloxía, Filoloxía e Música (Guitarra Clásica). Premio Nacional da Crítica Española en dúas ocasións (1985 e 2005), foi finalista do Premio Nacional de Literatura co libro de poemas “Seivas de amor e tránsito” no ano 1985.
Traducido a máis de dez idiomas e con máis de 15 libros de poemas publicados, está presente na antoloxía universal de poesía “De totselsvents”, publicada en Barcelona no ano 2004 por Miquel Desclot. Foi deputado no Congreso do Estado español en dúas Lexislaturas.
