Bisbarra, 15 de decembro do 2022 – O Goberno aproba 16 proxectos de sustentabilidade turística en destino para Galicia con fondos do Plan de Recuperación
Dos catro proxectos para a sustentabilidade da provincia da Coruña tres están na bisbarra de Compostela. Destínanse á Mancomunidade de Municipios Ría de Arousa Zona Norte, que implica ao Barbanza; á Asociación Local Terras de Santiago e á Vía Verde Compostela-Tambre-Lengüelle que conectará por fin a capital con Cerceda.
Os proxectos son financiados grazas aos fondos do Plan de Recuperación, Transformación e Resiliencia. Galicia recibirá en total 34.575.400 euros. Na Conferencia Sectorial de Turismo, celebrada este mércores, e na que se tomaron estas decisións a Ministra de Turismo Reyes Maroto dixo que “hoy dimos un paso muy importante para mejorar losa destinos turísticos españoles y hacer de ellos el motor de la competitividad”.
Sustentabilidade e competitividade
Os tres proxectos da bisbarra de Compostela reciben investimentos millonarios que apostan pola sustentabilidade e a competitividade. O plan Barbanza Arousa recibe un millón e medio de euros e céntrase en intervencións nos museos da Salgadura e da Conserva, ademais de incluír a rehabilitación sustentable do Liceo Marítimo Rianxeiro no que se denomina “viaxe a través da historia dos sabores”
Nas Terras de Santiago traballarase nunha nova experiencia enogastronómica cun investimento dun millón tres centos mil euros. Incluído nunha estratexia a nivel nacional o obxectivo é o desenvolvemento dun produto de turismo enogastronómico cun forte compoñente experiencial ligado ás actividades e á paisaxe agroalimentaria e que mobilice ao territorio cara a modelos de xestión sustentables e competitivos. En terceiro lugar o proxecto Vía verde Compostela-Tambre-Lengüelle disporá de algo máis de un millón trescentos mil euros. O obxectivo principal impulsar o destino turístico da Vía Verde como unha alternativa de turismo sustentable baseada no desenvolvemento dun produto turístico singular a partir da gastronomía e o resto de recursos materiais e inmateriais do territorio vinculados a ela (patrimonio histórico, paisaxístico, cultural…).
