A alcaldesa, Goretti Sanmartín, e a tenenta de alcaldesa, María Rozas, visibilizaron a unidade da coalición nun encontro cos medios de comunicación no Pazo de Raxoi.
No acto a alcaldesa de Compostela repasou algúns dos logros conseguidos en estes dous anos de goberno e que marcan a traxectoria da coalición. O desbloqueo da operación Peleteiro, a taxa turística, a regulación de pisos turísticos ou distintas obras da cidade foron algúns dos fitos destacados por Sanmartín.
Tamén puxo en valor o feito de ter aprobados dous orzamentos pese a estar en minoría e o bo avance de proxectos xa iniciados como a EDAR o a estación Intermodal. A alcaldesa rematou a intervención comentando “Se isto todo que acabo de vos ensinar aconteceu en dous anos, imaxinade o que pode pasar dentro de dous anos máis cando cheguemos a 2027”.
Goretti Sanmartín defendeu “que os datos obxectivos se impoñen” fronte aos que preconizaban ou falan de caos, aínda que tamén sinalou que “fica moito que facer en Compostela”. “O Pazo de Raxoi xa non será o mesmo cando remate a obra que nestes momentos está en marcha, que fará este edificio máis accesible para a veciñanza e que permitirá, ao mesmo tempo, coñecer a súa historia”.
Durante a súa intervención, incidiu que este goberno está tomando decisións “estruturais e, por tanto, a medio e longo prazo, mais cuxos resultados xa comezan a verse”. A modo de exemplo, anunciou que esta semana se dará a coñecer a modificación puntual da regulación de usos do ‘Plan Especial de Protección e Rehabilitación da Cidade Histórica’.
Entre outras novidades, avanzou que non permitirá a implantación de novos establecementos de tendas de recordos convencionais ou souvenirs en practicamente toda a cidade histórica e que limitará no recinto intramuros os negocios automatizados (como consignas ou máquinas expendedoras).
Un Santiago mellor
Pola súa banda, a tenenta de alcaldesa incidiu en que “acadamos avances moi significativos e sementamos outras transformacións que están por vir, e hoxe temos un Santiago de Compostela mellor que hai dous anos”.
María Rozas salientou que o Goberno de Compostela está cumprindo o compromiso asumido hai dous anos de que este fora o mandato do social “e temos avances incontestables, avalados polas cifras dos orzamentos, e que levan os nomes e apelidos das 22.000 persoas atendidas polos Servizos Sociais municipais, a cifra máis alta da historia coa excepción de 2020, e xusto cando Santiago ten a taxa de desemprego máis baixa da historia”.
A concelleira recordou os esforzos feitos polo Concello para incrementar o orzamento das bolsas de comedor escolar, actividades e material “coas que chegamos ao 20% dos nenos e nenas de Santiago, unha porcentaxe superior á de calquera outra cidade galega”; e as melloras introducidas nos programas de conciliación “cunha oferta por primeira vez para crianzas maiores de 12 anos”.
O reforzo do Servizo de Axuda no Fogar foi outro logro ao que se referiu a tenenta de alcaldesa, que salientou que “o Goberno local apostou por este servizo, e por asumir os custos que a Xunta segue sen asumir ainda sendo a súa competencia”.
María Rozas referiuse tamén á cuestión da mobilidade. Ao respecto, sinalou que “apostamos claramente, tamén do punto de vista económico, porque o do transporte sexa un verdadeiro servizo público, e aínda con todas as complexidades desta licitación temos sentadas as bases para un contrato que responda mellor ás necesidades da veciñanza”.
A tenenta de alcaldesa explicou que, entretanto, avanzamos noutras cuestións como a aprobación do PMUS, a planificación de novos carrís bici, o implantación dunha liña de bus directa ao aeroporto, ou o problema da falta de taxis “que este Goberno abordou por primeira vez”.
Por último, a tenenta de alcaldesa reivindicou que “traballamos noutras pequenas actuacións que melloran a vida da xente, como o arranxo do CSC de Vite no que se van investir máis de 300.000 euros; a apertura da Casa das Máquinas, o acondicionamento do Parque do Berce do Sar, ou o proxecto de restauración ambiental do Ecobosque do Banquete de Conxo, “seguindo unha maneira de facer política que é a de escoitar á veciñanza”.
