Bisbarra, 12 de agosto do 2024 – A conselleira de Medio Ambiente, Ángeles Vázquez, e o alcalde de Frades, Roberto Rey, mantiveron unha reunión na que acordaron colaborar na futura ampliación da estación de tratamento de auga potable (ETAP), de Ponte Carreira.
Na reunión tamén participou o concelleiro de Medio Rural de Frades, Manuel Ferreiro. Augas de Galicia xa avaliou un proxecto inicial de mellora da ETAP, presentado polo Concello. Desde a Consellería trasladáronse algunhas modificacións que era necesario incluír. Segundo lle comunicou o alcalde á conselleira, estase a ultimar a proposta reformulada para poder acometer esta iniciativa prioritaria para o municipio.
Actuación
Esta actuación suporía incrementar a capacidade de tratamento e operatividade da ETAP nun 20% a través da substitución das bombas existentes na captación e en alta e a instalación dun novo decantador así como doutro filtro.
Roberto Rey explica que “a necesidade de aumentar a capacidade de tratamento da ETAP é debida ao incremento do número de persoas aboadas a este servizo nos últimos anos, favorecido polas sucesivas ampliacións da rede de abastecemento que fomos executando en Frades nos últimos anos en colaboración coa Xunta de Galicia”.
O alcalde lembra que “a ETAP actual está ao límite da súa capacidade, polo que os filtros teñen que estar traballando as 24 horas do día para poder satisfacer a demanda existente no concello”.
Pola súa banda, Ángeles Vázquez indicou que a Xunta continuará prestando o seu apoio técnico e económico aos concellos para que poidan exercer as súas competencias de saneamento e abastecemento de xeito máis eficiente e prestar servizos de calidade á s súa veciñanza.
Área recreativa da presa
A maiores, a conselleira e o rexedor tamén falaron da petición de cesión do encoro sobre o río Tambre na área recreativa da Presa (Gafoi), que se atopa actualmente en dominio público hidráulico. O Concello prepara un proxecto para a reparación do encoro coa menor afección posible ao medio natural. Unha vez que a Consellería proceda ao seu arranxo da instalación, asinarase un convenio de colaboración para a súa cesión a Frades.
Este cambio de titularidade facilitaría ao Concello de Frades a realización de traballos de mantemento e conservación da área recreativa da Presa, unha das zonas de ocio máis concorridas do municipio.
Deste xeito, o Concello podería acometer a retirada das ramas e árbores caídas durante o inverno, como se realiza no resto das áreas recreativas do municipio, garantindo así que estea nas mellores condicións posibles durante todo o ano.
