Bisbarra, 27 de setembro do 2023 – O sexto plan de vías provinciais da Deputación destinará máis de medio millón de euros á nova senda peonil entre Ponte Carreira e Aiazo en Frades.
Unha obra que irá a pleno este vindeiro venres día 29. O alcalde de Frades, Roberto Rey, destaca o éxito da consecución desta obra, froito “das xestións feitas na Deputación nestes primeiros meses como deputado provincial e despois de moitos anos de defender as nosas propostas porque eran as máis xustas cos veciños e veciñas”.
Rey agradece especialmente o apoio amosado polo anterior responsable provincial de Vías e Obras, Xosé Manuel Pequeño, que “dende que veu visitar a zona e se decatou da necesidade desta senda non deixou de traballar por ela e mantivo o seu compromiso con Frades ata o final, deixando todo listo para que esta licitación sexa unha realidade”.
O alcalde engade que a obra licitarase nunha única anualidade e a Deputación achegará 48.066,64 euros para pagar as expropiacións de terreo aos veciños e veciñas propietarios. “Finalmente, a obra licitarase tal e como solicitou o Concello de Frades dende o primeiro momento e a pesar dos intentos dalgúns responsables políticos de forzar a división do proxecto ou instando a que fose o Concello quen negociara cos veciños a cesión gratuíta dos terreos, cando nesta mesma estrada e noutro concello si que se estaban pagando as expropiacións”, apunta Roberto Rey.
Finalmente, adianta que “nos próximos dous anos que estarei como deputado provincial traballarei para conseguir tamén a senda peonil de Moar ao longo da DP-3801, estrada na que non hai nin un quilómetro de senda en territorio de Frades. Tentaremos axilizar no posible a construción desa senda entre o cruce coa DP-3802 e a igrexa de Moar”.
Catorce anos de agarda
O Pleno Provincial deste venres porá fin a catorce anos de espera do Concello de Frades, dende que no ano 2009 pedir formalmente a inclusión de catro proxectos de sendas no Plan de Seguridade Viaria da Deputación da Coruña. So dous deles, que suman 1,5 quilómetros, están feitos, o que fai de Frades un dos municipios da provincia con menos quilómetros de sendas peonís en estradas provinciais.
O proxecto xa superou os trámites de aprobación tanto pola Comisión de Infraestruturas Viarias, Vías e Obras Provinciais como polo Servizo de Patrimonio e Contratación, ademais de contar cun informe de fiscalización favorable. Unha vez realizadas as expropiacións dos terreos necesarios e de seren licitadas as obras, o prazo de execución será de seis meses.
O proxecto inclúe a construción dunha senda peonil de case 2,5 quilómetros de lonxitude entre os núcleos de poboación de Aiazo e Ponte Carreira, seguindo a marxe esquerda da estrada DP-3802. Na actualidade o tránsito de peóns pola zona é moi perigoso xa que na maior parte do traxecto non hai cunetas transitable nin apenas lugares onde apartar no caso de paso de vehículos. Ademais, esta é unha das estradas de maior tránsito de vehículos no municipio.
