Bisbarra, 28 de xullo do 2023 – A Xunta de galicia ven de rematar a construción dunha senda peonil e ciclista, na estrada autonómica AC-524, na parroquia de Abellá en Frades.
A nova senda supuxo un investimento de algo máis de 225.000 euros. A intervención centrouse na execución dun novo itinerario de 770 metros de lonxitude que dá continuidade á senda da travesía de Abellá.
O novo percorrido favorecerá os desprazamentos cotiás da veciñanza e dos núcleos da Pibideira, O Pazo e Sobre dos Campos, tanto entre estas localidades como á hora de acceder a puntos importantes da parroquia como o cemiterio de Abellá, a Igrexa, a panadería, o supermercado, o consultorio de saúde, o campo de fútbol e o pavillón municipais ou o local social parroquial, entre outros.
O alcalde de Frades, Roberto Rey Martínez, agradece a celeridade da Xunta á hora de acometer esta senda que mellora a seguridade viaria. Rey lembra que esta actuación “se trata dunha primeira fase, pois dende o Concello temos a intención de conectar o núcleo da Pibideira co do Peñasco nunha segunda fase, que acometeremos nos próximos anos”.
Mellora da seguridade
Frades conta con esta nova senda cun itinerario peonil e ciclista pola marxe esquerda da estrada AC-524, de 770 metros de lonxitude, no treito comprendido entre os puntos quilométricos 7+820 e 8+590.
A sección tipo neste treito da estrada consta de dous carrís de 3,50 metros, beirarrúa de 1,40 metros, unha senda de 2,50 metros en cor terrosa e gabia transitable de 1,20 metros. Nas zonas de cruzamento empregouse pavimento podotáctil, de cor e textura diferente, ao igual que nos pasos de peóns, para facilitar o tránsito das persoas con problemas de visión.
As obras completáronse coa execución do sistema de drenaxe das augas pluviais, coa preinstalación para o alumeado público e a reposición dos servizos e sinais que se viron afectados na intervención. Tamén se instalou mobiliario urbano: bancos de madeira de piñeiro e papeleiras de listóns de madeira con estrutura interior metálica. A actuación do departamento de Infraestruturas da Xunta contou con financiamento da Unión Europea dos fondos REACT EU de resposta contra a pandemia.
Con estas actuacións, a Xunta dá resposta a unha actuación demandada polo Concello, que busca fomentar a mobilidade sustentable nesa contorna, con vivendas situadas nas marxes da estrada, para favorecer os desprazamentos a pé, alternativos ao uso do vehículo particular, e mellorar a seguridade viaria dos peóns, os usuarios máis vulnerables da estrada.
