Bisbarra, 5 de abril do 2023 – A rotura dunha balsa de áridos da empresa Erimsa, situada en Frades, leva os residuos ata a canle do río Tambre.
O 112 recibiu un aviso que fixo activar os mecanismos de protección. A central de emerxencias alertou aos concellos que poderían estar afectados xa que as augas do río Tambre, dos que se nutren, poderían estar contaminadas.
Segundo o 112 “ás 12:10 horas, o persoal de control de verteduras de Augas de Galicia chamou explicou que se producira unha rotura nas balsas de áridos dunha canteira en Frades. A vertedura resultante alcanzou o río Tambre”.
A continuación, os xestores do Centro Integrado de Atención ás Emerxencias procederon a informar aos concellos de Frades, O Pino, Oroso, Santiago, Trazo, Val do Dubra, Ames, A Baña, Negreira, Brión, Noia e Outes, que realizan captacións de auga no río afectado.
O SLG pide responsabilidades
O Sindicato Labrego Galego pediu, SLG, responsabilidades polo sucedido. O sindicato presentou denuncia ante a Consellaría de Infraestruturas e Mobilidade Augas de Galicia, na Vicepresidencia Primeira e Consellería de Economía e na Consellería de Medio Ambiente, Territorio e Vivenda.
O SLG considera que o sucedido podería ser constitutivo de delito contra o medio ambiente e os recursos naturais, así como de infraccións administrativas atendendo ao Regulamento do Dominio Público Hidráulico e outra normativa de aplicación.
O sindicato solicitou que se investiguen as actuacións denunciadas, contribuíndo ao esclarecemento das mesmas e ao mantemento e restablecemento da legalidade. Lembran ademais que se viu afectada a rede natura.
