O muíño de Ponte Carballa está situado na área recreativa do mesmo nome, na parroquia de Abellá e recibiu un investimento de máis de 17.000 euros.
O concello de Frades ven de rematar as obras de rehabilitación do muíño da Ponte Carballa. Uns traballos que foron posibles grazas a unha axuda da Consellería de Medio Ambiente e Cambio Climático, ao abeiro da orde pola que se establecen as bases rdas axudas para estudos e inversións vinculados á conservación, recuperación e rehabilitación do patrimonio natural e cultural e á sensibilización ecolóxica na rede Natura 2000 de Galicia.
O muíño de Ponte Carballa foi tamén confianciado polo Fondo Europeo Agrícola de Desenvolvemento rural (Feader) no marco do Plan estratéxico da PAC 2023-2027 en Galicia, en réxime de concorrencia competitiva. Esta actuación supuxo un investimento de case 17.500 euros, dos que 14.442 euros proceden da aportación da Consellería de Medio Ambiente e Cambio Climático e o resto dos fondos Feader.
As obras consistiron na instalación dun novo tellado illante, sobre a que se colocou unha cuberta de tella que substitúe ao anterior tellado, que estaba moi deteriorado. Así mesmo, procedeuse a retirar a madeira danada do taboleiro, que foi substituída por novas táboas de castiñeiro.
A maiores, o Concello de Frades procedeu a abrir a canle de saída do muíño de Ponte Carballa, tal e como existía antigamente, e rehabilitou a canle de entrada. Finalmente, renovouse a porta de madeira do muíño, á que se lle cambou a pechadura.
