Frades, 22 de xuño do 2022 – O Concello de Frades vén de presentar a súa programación para o verán 2022, que recolle máis de trinta actividades para todas as idades.
O verán en Frades ofrecerá desde trece excursións, a media ducia de actividades deportivas ou numerosas propostas dirixidas á cativada.
O programa de actividades de verán de Frades inclúe ademais un programa de conciliación familiar. O programa completo pode consultarse na web municipal.
O Programa mantén as actividades tradicionais como os Xoves de Praia, a excursión ao Aquapark, o Día do Neno, a Festa da Auga, ou as noites de cine. Tamén se recuperan as actividades deportivas: campionato municipal de pesca infantil, cursos de natación, Día da Bicicleta, campionato de pádel ou o novo curso de pilates de verán.
Frades propón ademais novas iniciativas como unha excursión ao Barqueiro-Ortigueira no que a veciñanza poderá optar por visitar Estaca de Bares e o pobo do Barqueiro ou facer unha ruta en caiac pola ría.
Outra novidade será unha excursión de catro días a Navarra e A Rioxa, que terá lugar do 22 ao 25 de setembro. A maioría das actividades serán de participación libre e gratuíta, se ben sempre será preciso anotarse no Concello de Frades: 981 695 567 ou 981 695 663.
