Frades, 31/07/2026 – Frades celebrou o pleno ordinario correspondente a xullo no que quedou demostrada “a boa saúde financeira do consistorio” en palabras do goberno. Algo apoiado polo decreto de liquidación do exercicio 2025, que certifica un excelente período medio de pago aos provedores de só 10,52 días.
Esa situación económica permite a Frades aprobar en este mesmo pleno, de forma unánime, un suplemento de crédito de 95.000 euros destinado integramente a investimentos sustentables no rural.
O goberno popular de Roberto Rey subliñou que estes fondos aplicaranse a pistas que xa non admiten un simple parcheo, senón que precisan dunha reforma estrutural completa desde a zona interna da calzada.
A corporación municipal aprobou tamén, coa abstención do PSOE, fixar como festivos locais para o ano 2027 o Martes de Entroido e o día de San Xoán.
Solucións reais para o abastecemento de auga
Un dos momentos máis destacados da sesión produciuse na quenda de rogos e preguntas, cando o alcalde, Roberto Rey, fixo balance sobre as incidencias puntuais coa subministración de auga no mes de xullo. O rexedor puxo en valor o inmenso músculo agrogandeiro do municipio, que conta con 70 granxas (con preto de 300 vacas de media).
Rey ilustrou a magnitude do desafío hídrico cunha comparativa clara: “Darlle auga a unha destas granxas é como darlle auga a toda unha parroquia”. Na actualidade, a rede de Frades soporta un consumo equivalente ao dunha poboación de máis de 30.000 habitantes.
Ante esta enorme demanda estrutural, o alcalde avanzou que a estratexia do goberno local non pasa por instalar un novo depósito, xa que a presión pérdese polo camiño, senón que xa se está a formular a ampliación e mellora da actual planta potabilizadora para garantir un servizo óptimo e de futuro tanto para a veciñanza como para o sector primario.
“O dato mata ao relato” en materia sanitaria
No eido sanitario, o grupo de goberno de Frades amosou a súa vontade de consenso apoiando unha moción do PSOE sobre a situación da atención primaria. Con todo, Manuel Ferreiro Marzoa, concelleiro de Sanidade, desmontou calquera crítica á xestión local baixo a premisa de que “o dato mata ao relato”.
O goberno demostrou con cifras que Frades conta hoxe con máis profesionais e lembrou o esforzo extraordinario do Concello, que está a actuar máis alá das súas competencias estritas financiando a instalación de sistemas de aerotermia e nova iluminación LED para renovar o centro de saúde local.
Seguridade viaria: diálogo fronte a expropiacións
A proactividade do equipo de Roberto Rey tamén se materializou noutra moción de urxencia, defendida polo concelleiro popular Manuel Ferreiro, para reclamar a mellora viaria e a creación dun itinerario peonil entre a DP-3801 e a DP-3802 ao seu paso por Moar.
Esta infraestrutura conectará con seguridade puntos neurálxicos como a igrexa, o parque xuvenil, a capela de San Roque e o campo da festa, poñendo en valor o patrimonio. Aprobada por unanimidade, a obra xa está incluída no novo plan, destacando o compromiso do alcalde por levar adiante os traballos de forma negociada cos propietarios, evitando en todo momento recorrer á expropiación de terreos. Por último, en relación ás reclamacións históricas sobre o estado da N-634, o grupo de goberno mantivo a súa firmeza fronte ao Executivo central.
Tras o recente escrito do Estado propoñendo unha cesión gratuíta da vía, rexeitada en pleno por tratarse dunha reivindicación pendente dende 2018 sen o correspondente arranxo previo, o Goberno de Frades advertiu que “o Concello non pode estar a tonterías” cos vaivéns de Madrid. O proxecto de reforma supera xa o millón de euros e o Concello exixe a sinatura dun convenio oficial e serio antes de iniciar calquera nova conversa.
