Imaxe dunha edición anterior de O fío do tempo
Frades, 22/04/2026 – O Concello de Frades, en colaboración cos Servizos Sociais da Deputación da Coruña, pon en marcha “O fío do tempo”. Un programa de actividades interxeracionais nas que participarán as persoas usuarias das casas do maior “Sorrisos” (Abellá) e “O Noso Fogar” (Galegos), así como rapazada da ESO do CPI Ponte Carreira.
Manuel Ferreiro, alcalde en funcións, explica que co “O fío do tempo” o Concello de Frades pretende promover a transmisión de valores, inquedanzas, coñecementos e vivendas entre estes dous grupos de idade.
Ferreiro engade que “a transmisión de coñecementos e experiencias por parte dos maiores, así como o pulo e as inquedanzas dos máis novos son algo do que ambos grupos poden sacar cousas moi positivas. En especial nun concello coma o noso, con tanta xente maior, onde temos a obriga de perpetuar o seu legado”.
A estrea de “O fío no tempo” terá lugar este venres 24 de abril, a partir das 10:00 horas, no centro sociocomunitario de Ponte Carreira. Nel participarán as dez persoas maiores usuarias das casas do maior “O noso fogar” e “Sorrisos”, así como un grupo da ESO do CPI Ponte Carreira.
“Sempre defendín este tipo de encontros interxeracionais. Ver a maiores e rapazada desfrutando xuntos, compartindo vivencias, paréceme do mellor que se pode facer e agardamos que as persoas que participen desfruten desta experiencia e queiran repetir”, apunta Ferreiro Marzoa.
A intención do Concello de Frades é que “O fío no tempo” se asente como un encontro periódico entre os maiores e a mocidade do municipio, de forma que se programan distintas sesións ao longo do ano.
Esta iniciativa xurde tras o éxito do programa “Lecturas compartidas cos nosos maiores”, posto en marcha polo CPI Ponte Carreira, a través do equipo do equipo de dinamización da lingua galega e da biblioteca do centro, en colaboración co Concello de Frades.
