Frades, 5 de xullo do 2022 – A Xunta de Galicia ven de autorizar o proceso de expropiación que permitirá a construción dunha senda peonil na AC-524 no concello de Frades.
Unha senda que redundará na seguridade viaria da veciñanza. O proxecto de senda peonil ten previsto un investimento de 245.000 euros. En esta cantidade inclúense o pago das expropiacións autorizadas.
O alcalde de Frades, Roberto Rey, agradeceu a celeridade da Xunta de Galicia á hora de acometer esta importante mellora da seguridade viaria no municipio. Un tramo coñecido popularmente como “a costa de Abellá”, onde se mellorarán as condicións de seguridade.
A nova senda peonil favorecerá o acceso a puntos importantes da parroquia como o cemiterio de Abellá, a Igrexa, a panadería, o supermercado, o campo de fútbol ou o local social, entre outros. Así mesmo, Rey Martínez lembra que esta actuación “se trata dunha primeira fase, pois dende o Concello temos a intención de conectar o núcleo da Pibideira co do Peñasco nunha segunda fase que acometeremos nos próximos anos”.
Mellora da seguridade
As obras habilitarán un itinerario peonil pola marxe esquerda da estrada AC-524 de 770 metros de lonxitude. Isto permitirá a conexión entre el núcleo rural de Pibideira e os núcleos do Pazo e Sobre dos Campos, conectando coa senda existente na travesía de Abellá.
A sección tipo neste treito da estrada constará de dous carrís de 3,50 metros, beirarrúa de 1,40 metros, unha senda de 2,50 metros en cor terrosa e gabia transitable de 1,20 metros.
Nesta intervención, as obras de pavimentación terán en conta os accesos a propiedades privadas, que serán en formigón coloreado con mallazo e de cor terra natural, empregándose nas zonas de cruzamento con outras vías pavimento táctil de cor e textura diferente, indicador de advertencia ou proximidade. Nos pasos de peóns colocarase pavimento táctil direccional.
As obras incluirán a execución do sistema de drenaxe de augas pluviais e a reposición daqueles servizos afectados pola intervención, incluíndose a recolocación dos sinais verticais e colocación de captafaros. Tamén se prevé a preinstalación da iluminación pública e mobiliario urbano: catro bancos de madeira de piñeiro e outras catro papeleiras de listóns de madeira e estrutura interior metálica.
Con estas actuacións, a Xunta dá resposta a unha actuación demandada polo Concello, que busca fomentar a mobilidade sustentable nesa contorna, con vivendas situadas nas marxes da estrada, para favorecer os desprazamentos a pé, alternativos ao uso do vehículo particular, e mellorar a seguridade viaria dos peóns, os usuarios máis vulnerables da estrada. A Consellería de Infraestruturas e Mobilidade prevé convocar o levantamento de actas previas no segundo semestre de 2022 e licitar, a continuación, as obras, que contan cun prazo de execución de 4 meses.
