GREEN CAPITAL POWER S.L.
Bisbarra, 30 de xaneiro do 2023 – Tras a suspensión dos parques de Campelo e Bustelo, e a DIA negativa do de Alvite, a Xunta declara tamén ambientalmente non viable o de Gasalla.
O equipo de Goberno de Frades celebra esta declaración desfavorable do proxecto do parque eólico Gasalla emitida pola Dirección Xeral de Calidade Ambiental, Sostibilidade e Cambio Climático da Consellería de Medio Ambiente, Territorio e Vivenda.
Un proxecto que pretendía instalar 7 aeroxeradores de 3,465 MW de potencia unitaria (24,255 MW de potencia total) nos concellos de Frades e Mesía promovido tamén por Green Capital Power SL.
O concelleiro de Medio Rural, Manuel Ferreiro Marzoa, explica que “dende o Concello de Frades presentamos unha alegación con ata 16 puntos no que amosabamos a nosa total oposición ao parque eléctrico de Gasalla e celebramos que finalmente a Xunta atendera a nosa petición e emitira Declaración de Impacto Ambiental negativa”.
A este proxecto formuláronse un total de 551 alegacións, das que 536 foron presentadas por particulares, 2 por Concellos (Frades e Mesía) e 13 por asociacións, empresas e outras organizacións.
Presentación de alegacións
Ferreiro Marzo engade que “De feito, ademais de presentar a nosa alegación, o Concello de Frades puxo a disposición da veciñanza os servizos da oficina técnica de Urbanismo do Concello para informarlles sobre a situación e axudarlle á presentación das súas propias alegacións”.
Esta non é a primeira ocasión na que o Concello de Frades presenta alegacións contra un proxecto de parque eólico. En abril de 2021, o equipo de Goberno fradense presentou alegacións ao parque eólico Brancellao por non ser compatible nin co planeamento nin co medio socioeconómico e produtivo do municipio. Un proxecto que tamén recibiu informe de impacto ambiental negativo por parte da Xunta de Galicia, como o de Gasalla agora.
Manuel Ferreiro recalca que “a non posición non é contraria á implantación de enerxías renovables, sempre que sexa dunha forma ordenada e programada naqueles territorios que se consideren idóneos, en coordinación previa coas entidades locais e sempre que gocen dunha ampla aceptación veciñal. Así o temos manifestado en numerosas ocasións e, dende 2019, mantemos un acordo co resto dos alcaldes da Mancomunidade de Ordes para dicir non aos parques eólicos na comarca”.
