Frades, 20/05/2026 – O Concello de Frades vén de rematar as obras de mellora dos accesos á aldea de Caboladrón (Mesos) e ao punto limpo de Frades (Céltigos), un proxecto que supuxo un investimento de 181.496 euros.
Os traballos tamén incluíron melloras no aparcadoiro do CPI de Ponte Carreira (Gafoi) así como en dous entronques coa estrada DP-3802 na parroquia Aiazo e na pista de O Pazo a Vistalegre (Galegos).
O alcalde en funcións, Manuel Ferreiro, destaca que “neste proxecto incluímos unha obra moi demandada pola veciñanza, como é a mellora do firme no CPI de Ponte Carreira. Aló aglomeramos unha superficie de 500 metros cadrados para pintar as prazas de aparcamento, dando así resposta a unha necesidade que se pon especialmente de manifesto cando se organizan eventos no polideportivo municipal”.
Esta actuación permitiu arranxar 2,5 quilómetros de estradas, todos eles con 3 centímetros de mestura bituminosa previo bacheo con grava e tratamento asfáltico en toda a superficie da estrada. No caso da pista de Pazo a Vista Alegre executáronse tamén dúas cunetas de seguridade en formigón, baixo a que se canalizou a recollida de augas pluviais con 10 arquetas sumidoiro.
Melloráronse tamén dous entronques coa estrada provincial DP-3802 ao seu paso pola parroquia de Aiazo, concretamente nos puntos quilométricos 13,8 e 13,6, onde se acondicionou con 5 centímetros de aglomerado en quente unha superficie de 380 metros cadrados, co posterior pintado das liñas de bordo e sinalización horizontal. Unhas actuacións incluídas no Plan Único de Concellos POS+2025.
