Bisbarra, 28 de marzo do 2023 – O concello de Frades ven de inaugurar o MUFRA, o único museo de etnografía e historia na comarca de Ordes.
O Museo da cultura e tradicións de Frades (MUFRA) ocupa o segundo andar do edificio multiúsos. Un proxecto que reúne pezas da antiga colección de apeiros de labranza do Concello de Frades e outras pezas relacionadas co traballo no rural do municipio, achegados pola propia veciñanza.
O alcalde, Roberto Rey, explica que con este proxecto “queremos amosar ás futuras xeracións a rica herdanza que nos deixaron os nosos antepasados, dar a coñecer a súa forma de vida, os seus costumes, a través de obxectos, documentos e rexistros fotográficos”.
O Museo continúa aberto á cesión de calquera peza, documento ou fotografía por parte dos veciños e veciñas de Frades. Para iso, só é preciso chamar ao Concello de Frades (981 695 567) ou ao coordinador do Museo, o historiador Manuel Pazos (680 824 910) que explica que “Ocuparémonos de recoller as pezas ou as fotografías e, se é preciso, elaboraremos un documento de doazón, cesión temporal ou depósito”.
Éxito da xornada de portas abertas
A pesar da choiva, centos de veciños e veciñas achegáronse ao longo da tarde do sábado ao MUFRA para coñecer as súas seccións. Por unha banda está a arqueoloxía que conta con material relacionado co mundo das medorras, coa cultura castrexa e coa romanización.
No eido da etnografía sitúanse os elementos propios dunha casa rural, apeiros de labranza e dos oficios tradicionais: labrega, carpinteiro, cesteiro, ferreiro, tecelá, zoqueiro, costureira, telleiro… a sección que ocupa maior espazo.
Finalmente o MUFRA ten outros apartados máis reducidos como os destinados aos tecidos, co proceso do liño ou un tear; á tecnoloxía, con cámaras fotográficas analóxicas, fotografías, casetes, tocadiscos, teléfonos, máquinas de escribir…; a escola tradicional, con encerados, pupitres, mapas, manuais escolares, xogos… e á música tradicional con gaitas, pandeiretas, pandeiros ou tambores.
As seccións máis concorridas durante a xornada de portas abertas foi de fotografías antigas de Frades, nas que practicamente todos os visitantes recoñecían a algunha ou algún familiar ou amizade. Así mesmo, resultou especialmente curioso ver como os avós e avoas ensinaban aos seus netos e netas a xogar cos xoguetes en madeira que utilizaban eles de pequenos. O grupo Faíscas da Pontraga foi o encargado de poñer a nota musical á xornada.
O Museo da cultura e tradicións de Frades (MUFRA) está incluído no proxecto Centro de Cultura Tradicional “A Herdanza do Pasado”, un proxecto promovido polo Concello de Frades que inclúe tanto a creación deste Museo de Frades como a cooperación e financiamento de actividades paralelas dirixidas á conservación das tradicións rurais do municipio, como puideron ser a celebración dun magosto en Aiazo, a exposición etnográfica da I Festa do Rural de Frades, a Festa da Filloa de Abellá ou a próxima Festa da Merenda de Aiazo, deste domingo 2 de abril.
A recollida e posta en valor das pezas do museo foi labor da empresa “Acervo. Acción cultural”, dirixida por Manuel Pazos. O proxecto está financiado pola Unión Europea a través dos fondos NextGeneration e en cuxa xestión participan a Axencia Galega das Industrias Culturais, o Ministerio de Cultura e Deporte do Goberno de España e o Plan de Recuperación, Transformación e Resiliencia. A concesión da axuda está apoiada pola Xunta de Galicia, no marco do Xacobeo 2021-2022.