Bisbarra, 8 de setembro do 2022 – Se o mes de setembro é tempo de romarías cada vez súmanse máis citas e entre elas a I Festa Rural que organiza desde este ano o concello de Frades.
A cita será os días 17 e 18 de este mes. A I Festa Rural de Frades incluirá mercado de artesanía, exposición etnográfica, festival folclórico, verbenas e degustación de callos.
A praza de Ponte Carreira é o lugar escollido para esta cita. A I Festa Rural está organizada en colaboración coa asociación de veciños Rexente, a asociación da terceira idade de Frades, a Xunta de Galicia e a Deputación da Coruña.
A festa arrincará na tarde do sábado 17 de setembro coa apertura do mercado de artesanía e dunha exposición etnográfica, que se poderán visitar durante os dous días. A partir das 20:00 horas, o mago Román García presentará o seu Festival Galicia Ilusiona Maxia, que dará paso a unha verbena popular co Dúo Élite.
Xantar popular
O domingo 18 dará comezo cun pasacalles con Embruxo Gaiteiros, que amenizará o mercado de artesanía. Os xogos tradicionais estarán a disposición de todas as idades, ao longo de toda a xornada. A partir do mediodía haberá unha exposición de motos antigas e unha degustación de callos, que dará paso a unha sesión vermú coa orquestra Salsarena.
A I Festa Rural continuará cun xantar popular na mesma Praza de Ponte Carreira. O menú estará composto por uns entrantes de empanada e xamón, seguido por callos e xarrete con verduras. De sobremesa haberá larpeira e xeado.
O prezo do menú será de 25 euros para persoas adultas, 18 euros para menores de 12 anos e de balde para os cativos e cativas de menos de 5 anos. As entradas estarán á venda no Concello de Frades, na asociación de veciños Rexente, na asociación da terceira idade de Frades e nos bares de Ponte Carreira ata o 15 de setembro.
Para baixar o xantar, de 17:00 a 19:30 horas terá lugar unha nova edición do Festival Folclórico. Nesta ocasión participarán os grupos Sarillo (Aiazo), Medorra con Troula (Galegos) e Carapaus (Santiago). A orquestra Salsarena será a encargada de pechar esta I Festa Rural do Concello de Frades cunha verbena que dará comezo ás 20:00 horas.