Bisbarra, 21 de marzo do 2023 – A IX Festa da Filloa de Abellá, en Frades, foi todo un éxito de participación, xa que cerca de 2.000 persoas pasaron ao longo do pasado sábado por alí.
A novena Festa da Filloa celebrouse no pavillón municipal. Un espazo no que a xente puido degustar as filloas con lacón, acompañadas dunha boa cunca de caldo galego. Uns pratos que foron posibles grazas ao labor das e dos filloeiros, así como de todas as persoas voluntarias que participaron no evento ao longo de toda a xornada.
A festa estivo amenizada polos gaiteiros do grupo “Son da terriña”, da parroquia de Galegos, así como pola orquestra Barceló e Chocolate Disco Móvil, que fixo que a festa se prolongara ata a madrugada do domingo. Así mesmo, os máis cativos puideron gozar de inchables e divertidos obradoiros.
A IX Festa da Filloa de Abellá foi organizada pola asociación de veciños “Os Labregos de Abellá”, en colaboración co Concello de Frades, e conta co financiamento do Agadic, Next Generation EU, Ministerio de Cultura e Deporte, Plan de Recuperación, Transformación e Resiliencia, dentro do proxecto Centro de Cultura Tradicional do Concello de Frades.