Frades, 10/03/2026 – O alcalde en funcións de Frades, Manuel Ferreiro Marzoa, mantivo unha reunión co xerente da Área Sanitaria de Santiago de Compostela e Barbanza, José Manuel Facio Villanueva, para organizar a execución das obras de mellora da eficiencia enerxética no centro de saúde de Ponte Carreira.
Ferreiro dixo que “Imos acometer unhas obras que van mellorar de xeito moi considerable as instalacións e as condicións nas que se presta a atencións sanitaria no centro de saúde de Ponte Carreira, o que beneficiará tanto á veciñanza como ao persoal sanitario que aló traballa, e estivemos analizando coa Xerencia a maneira de organizar todo para que a repercusión dos traballos sexa a mínima posible para os veciños e veciñas de Frades”.
O proxecto “Obra de eficiencia enerxética no centro de saúde de Ponte Carreira” conta cun investimento de máis de 150.000 euros e contempla o cambio de toda a arquitectura metálica do centro de saúde de Frades, así como os seus sistemas de calefacción e de iluminación. Unha actuación que se prevé executar antes do inverno de 2026.
Un centro case novo
Por outra banda, o alcalde en funcións de Frades aproveitou a reunión para agradecerlle a José Manuel Facio “a boa disposición da Consellería de Sanidade a asinar un novo convenio de colaboración co Concello de Frades para facer unha sala de emerxencias e pintar o interior do centro de saúde, ben a finais de 2026 ben no primeiro semestre de 2027”.
O alcalde sinala que “se a estas actuacións lle engadimos o cambio da cuberta do centro de saúde, no que investimos 50.000 euros o pasado ano 2025, practicamente quedará un centro de saúde novo para unha mellor atención aos veciños e para que os profesionais que traballan nel poidan gozar dunhas condicións óptimas para desenvolver o seu traballo”, recordando que “no que son as súas competencias municipais en materia sanitaria, o Concello de Frades está cumprindo coa veciñanza”.
Obras realizadas
Durante o 2025, e grazas a outro convenio de colaboración entre o Concello de Frades e a Consellería de Sanidade, investíronse case 50.000 euros na renovación integral da cuberta do centro de saúde de Ponte Carreira, o que permitiu rematar cos problemas de humidades que afectaban a esta instalación. Así, a antiga cuberta de chapas de aceiro foi substituída por outra de placas de policarbonato translúcidas e paneis sándwich illantes de aceiro.
Deste xeito, o centro mellorou non so o seu illamento térmico, senón que tamén aumentou nun 90% a súa luminosidade. A maiores derrubouse un peto de fábrica de ladrillo que rodeaba o edificio e que foi substituído por canalóns para a recollida das augas pluviais, con baixantes e rebosadeiros, o que evita filtracións da auga da chuvia ao interior das instalacións e incrementa o confort dos pacientes.
