Frades, 12 de novembro do 2020 – O Concello de Frades e a Xunta de Galicia están a traballar no acondicionamento do Museo de apeiros de labranza.
Este Museo de Apeiros está situada no primeiro andar do edificio multiusos, a carón da casa do concello. O investimento de 28.000 euro servirá, en palabras do alcalde Roberto Rey, para “mellorar a parte de arriba do multiúsos para poñer a funcionar o museo así como facer traballos de mantemento e posta a punto de algún dos apeiros que o integran”.
O primeiro andar conta cunha superficie de 215 metros cadrados que acollen desde o verán de 2019 todos os elementos do Museo de Apeiros de Labranza. Esta planta estaba en desuso e empregouse para almacenar todas as pezas ao acoller a planta baixa a biblioteca municipal, a aula de informática e unha sala multiusos.
O Concello de Frades achega a este proxecto 10.000 euros de fondos propios e a Xunta de Galicia os 18.000 restantes. No 2019 investíranse en este edificio 40.000 euros na remodelación da planta inferior nun proxecto xestionado pola Axencia Galega de Desenvolvemento Rural (Agader).
O acondicionamento converterá a planta superior nunha sala etnográfica que serva de homenaxe ás mulleres e homes do campo galego. As persoas que visiten o museo poderán contemplar moitos dos útiles e ferramentas do campo e do fogar que foron e seguen sendo os compañeiros cotiás do traballo e da vida familiar no rural. Así mesmo, conta con paneis explicativos sobre como eran as actividades agrícolas e gandeiras no municipio.
