Bisbarra, 15 de xullo do 2022 – O aumento das temperaturas ten como consecuencia directa un aumento do consumo de auga e o concello de Frades decidiu reducir os usos da traída municipal ao imprescindible.
Frades decidiu prohibir prohibe a utilización da auga procedente da traída municipal para o enchido de piscinas ou a rega de cultivos e xardíns, actuacións para os que a veciñanza pode seguir empregando mananciais ou pozos propios, no seu caso.
A decisión, amparada polo artigo 14 J do Regulamento municipal de abastecemento de auga e saneamento, ten como obxectivo garantir o mantemento do subministro para uso domiciliario e das explotacións gandeiras.
O Concello de Frades decidiu adoptar esta medida debido a que, coa chegada do verán e destas vagas de calor, comeza a haber problemas co subministro de auga debido ao considerable aumento do seu consumo e á súa escaseza.
Dende o Concello apelan á responsabilidade da veciñanza á hora de facer un consumo responsable da auga. “Agradecemos a colaboración de todos os veciños e veciñas pois son unhas medidas coas que tentamos manter o subministro para uso nas casas e nas explotacións gandeiras”, explica Roberto Rey, alcalde de Frades.
