Bisbarra, 5 de setembro do 2022 – O concello de Frades lembra á veciñanza que continúan aberto o servizo gratuíto de axudas técnicas dirixido a persoas con discapacidade e dependencia recoñecida.
As axudas técnicas á mobilidade están dirixidas a persoas cuns ingresos inferiores ao 150% do IPREM, así como a veciños con limitacións funcionais graves que necesitan axuda doutra persoa para actividades básicas da vida diaria.
Tamén está dispoñible para persoas que por motivos temporais teñan reducida a mobilidade. Todos eles poderán acceder de forma gratuíta a un catálogo inicial de produtos que inclúe: camas articuladas, cadeiras de rodas, andadores e guindastres para levantar ou pousar ás persoas.
O servizo comezou a funcionar en maio pasado. Poden acceder as persoas empadroadas en Frades que, cumprindo os requisitos, non teñan axudas do mesmo tipo de outras institucións. Dito servizo súmase aos de axuda no fogar, teleasistencia, podoloxía, fisioterapia, bono-taxi ou perruquería a domicilio que xa oferta o concello fradense.
O servizo de préstamo será de 18 meses, salvo casos excepcionais como falecemento ou solicitude de baixa por parte da persoa usuaria, uso indebido da asistencia técnica ou perda dos requisitos de acceso ao servizo. Os interesados deberán ter en conta que a aprobación do mesmo concederase segundo a orde de recepción das solicitudes. O material será achegado por unha empresa especializada de Ordes, que gañou o proceso de licitación.
Para solicitar as axudas é preciso presentar fotocopia do DNI ou tarxeta de residencia de todos os integrantes da familia, certificado de empadroamento (cun mínimo de 6 meses de antigüidade), documentación que acredite o grao de discapacidade/dependencia ou informe médico xustificativo e documentación xustificativa da renda económica da unidade familiar.
