Bisbarra, 1 de setembro do 2022 – O concello de Frades instalará un ascensor no centro multiúsos para facilitar a accesibilidade de persoas con mobilidade reducida.
O Multiúsos situado en Cimadevila, ao carón da casa do concello, recibirá para este fin un investimento de 59.950 euros. O concelleiro de obras, Manuel ferreiro, indica que “A intención é colocar un ascensor e arranxar os arredores do multiúsos para así mellorar a súa accesibilidade e facilitar o acceso á planta alta de persoas con mobilidade reducida”.
O proxecto atópase na fase de licitación. A proposta é dun elevador eléctrico, que no precise cuarto de máquinas, cunha cabina dun metro de ancho e 1,25 metros de profundidade. Asa dimensións o converten nun ascensor practicable segundo a normativa autonómica e accesible segundo o código técnico da edificación.
Por outra banda, preténdese acondicionar o chan exterior do multiúsos para nivelalo e garantir o acceso ao edifico en condicións accesibles. Para iso, estenderase formigón impreso sobre o pavimento actual. As obras teñen un prazo de execución de catro meses.
Con esta actuación, o Concello de Frades completa o equipamento do edificio multiúsos, onde se xuntan servizos como a biblioteca municipal, a sala de estudos, a aula de informática con 16 ordenadores con conexión a Internet a alta velocidade, unha aula par cursos formativos (con capacidade para entre 15 e 25 persoas), outra aula para actividades con capacidade para ata 100 persoas (e que se pode dividir en dúas salas independentes) e o museo de apeiros de labranza.
