Bisbarra, 10 de outubro do 2023 – O Concello de Frades organiza unha andaina solidaria en favor de “A ilusión de Sergio”, unha iniciativa que recada fondos para un rapaz de Mesía cunha das denominadas enfermidades raras.
Sergio sofre de paraparesia espástia tipo 50 que causa déficit cognitivo, dificultade para camiñar e falar, ataques epilépticos… “A Ilusión de Sergio” e unha iniciativa que trata de conseguir fondos para que poida acceder a unha terapia xénica que lle permitiría mellorar.
A andaina solidaria terá lugar na xornada festiva do mércores 1 de novembro, a partir das 10:00 horas, e incluirá un percorrido de 6,5 km de dificultade media-baixa entre a praza publica de Ponte Carreira e Augasantas, ida e volta.
As inscricións terán un custo de 5 euros (menores de 10 anos de balde) e poderán facerse nas oficinas do Concello (981 695 567) antes do luns 30 de outubro. A actividade é apta para todas as idades.
Todo o recadado irá destinado á Fundación Columbus, para colaborar no caso de Sergio. A maiores, haberá un peto solidario para recoller donativos na propia Praza de Ponte Carreira, onde ao rematar a andaina haberá bebida e froita para todas as persoas participantes. Colaboran os supermercados Claudio e Tandy, de Ponte Carreira.
