Bisbarra, 13 de decembro do 2024 – Este sábado, 14 de decembro profesionais do turismo e representantes institucionais reuniranse en Negreira na segunda edición do Foro de internacionalización do Camiño a Fisterra e Muxía.
O evento, a celebrar no Auditorio Municipal Afonso Nunes, servirá de espazo de reflexión e diálogo ao redor da sustentabilidade, a innovación, a internacionalización e os valores que enriquecen a experiencia dos peregrinos no Camiño.
A xornada comezará ás 9:00h coa recepción de acreditacións, seguida dunha inauguración institucional ás 9:30 h, que contará coa participación de personalidades como Áurea Domínguez, presidenta da Asociación de Concellos do Camiño de Santiago a Fisterra e Muxía e alcaldesa de Fisterra; Xosé Regueira, vicepresidente e deputado de Turismo da Deputación da Coruña; Xosé Manuel Merelles, director da Axencia Turismo de Galicia; o alcalde de Negreira, Manuel Ángel Leis e o deputado de Deportes da Deputación da Coruña, Antonio Leira.
Premio para José Manuel Pequeño
Ás 10:00 h, farase entrega do galardón “Ti fas Camiño”, primeira edición dun galardón que busca recoñecer aquelas persoas que contribúen ao desenvolvemento e promoción deste itinerario cultural único. O premiado será José Manuel Pequeño, ex alcalde de Dumbría e promotor principal deste camiño e da creación da asociación de concellos.
As mesas redondas xirarán en torno a temas como: Camiño Sostible – Ameazas e retos cara ao 2027, a transformación da comunicación en torno ao camiño a través do Podcast, os servizos e valores complementarios na oferta turística deste territorio, a Promoción e internacionalización Turística do Camiño a través de expertos de Portugal, Irlanda e Reino Unido, unha ponencia sobre a estratexia slowlight para o camiño e unha última mesa sobre ferramentas tecnolóxicas para a internacionalización turística.
Este foro posiciónase como unha plataforma única para intercambiar ideas e establecer conexións entre os actores crave do Camiño de Santiago cara a Fisterra e Muxía, procurando ser un referente para o sector turístico galego.
Hoxe venres é o derradeiro día para inscribirse no foro, algo que se pode facer , ademáis de ver o programa completo, no seguinte enlace https://forms.gle/7g8aH612fJjRnaNF6 .
