O conflito do transporte está complicando a vida da cidadanía. Acudir ao traballo, ao médico o realizar unha xestión lonxe da casa nos días de folga está sendo complicado. O transporte escolar non é unha excepción como denuncian na comarca do Xallas.
As ANPAS dos distintos centros educativos da comarca do Xallas (CEIP Barrié de la Maza, IES Terra de Xallas, CEIP Pepe Xan Baña e CEIP Víctor Sáenz) denuncian o bloqueo sistemático do transporte escolar nas últimas xornadas da folga de transporte e exixen o cumprimento dos servizos mínimos.
A pesares de que o transporte escolar foi establecido coma servizo mínimo máis de 600 alumnos e alumnas de Santa Comba “víronse privados durante varias xornadas do seu dereito ao transporte debido á presenza de piquetes que impediron as saídas dos autobuses que cobren as distintas rutas escolares”.
As familias indican que “Entendemos as reivindicacións do sector, pero non é aceptable que os nosos fillos e fillas sexan as vítimas do conflito, cando existen uns servizos mínimos que non se están a respectar”.
As ANPAS solicitan a intervención das autoridades e as forzas de seguridade para garantir a libre circulación dos autobuses escolares e o cumprimento dos servizos mínimos, sobre todo de cara as futuras xornadas de folga convocadas para hoxe luns, mañá 20 e o vindeiro 23 de xaneiro.
As ANPAS de Xallas contan ademais a situación caótica que se da cada vez que esto sucede, obrigando a pais e nais a ausentarse de maneira imprevista dos seus postos de traballo para levar ou recoller aos seus fillos e fillas dos centros escolares.
Esta situación afecta especialmente ás familias que non teñen unha rede de apoio
“É un caos de conciliación inasumible para as familias” afirman as representantes das ANPAS “Non descartamos futuras mobilizacións conxuntas no caso de que a situación non se resolva e se siga impedindo o acceso dos menores ao transporte escolar”.
