Compostela, 10 de outubro do 2020 – Chega a segunda fin de semana de Curtocircuito que trae pratos fortes para os dous días nas distintas seccións.,
Hoxe sábado a programación segue medrando con propostas moi diversas. A primeira hora da tarde no CGAC haberá unha reunión con Proxecta, Cultura 2021: e agora que?, para debater sobre os problemas que afectan ao futuro do sector en tempos de coronavirus. O Salón Teatro acollerá ás 17:00 horas unha sesión moi especial para o festival. Trátase de XX: novas_creadoras, un foco para unir un traballo case colectivo da nova xeración de cineastas galegas onde os xéneros cinematográficos se mesturan e hibridan. Anxos Fazáns, Lucía Estévez, Marta Valverde, Arancha Brandón, Ariadna Cordal García, Sol Mussa, Iria Silvosa, Aldara Pagán, Judith Adataberna e Lara e Noa Castro; son as directoras e creadoras que proxectarán as súas obras neste encontro.
Pola súa banda, o Teatro Principal proxectará as últimas sesións de Sección Oficial RADAR e de Penínsulas a partir das 18:00 e con varios dos seus directores. RADAR pechará esta edición coas películas TESTFILM #1 (Telcosystems; Croacia, Países Baixos; 2020), Laguna Negra (Felipe Esparza; Perú, Francia; 2020) e Sun Dog (Dorian Jespers; Bélxica, Rusia; 2020). No caso das Penínsulas, pódense ver a partir das 20:15 O Arrais do Mar (Elisa Celda, 2020), Lonely rivers (Mauro Herce, 2019) e Profecía (Julieta Juncadella; 2020).
Os cineastas Oliver Laxe, Carla Simón e Celia Rico reuniranse ás 18:00, a través da pantalla, na mesa redonda dixital Autores: entre creación e industria. Numax pechará as súas portas nesta edición coa última sesión de Sección Oficial EXPLORA, que incluirá as curtametraxes A demonstration (Beny Wagner, Sasha Litvintseva; Alemaña, Países Baixos, Reino Unido; 2020), Aggregate States of Matters (Rosa Barba; Perú, Alemaña; 2019), Thorax (Siegfried A. Fruhauf; Austria; 2019), Kopierwerk (Stefanie Weberhofer; Austria; 2020), Tik Tak (Michael Fleming; Países Baixos; 2020) e Further radical (Stefano Canapa; Francia; 2020); e coa sesión especial Playlist que propón Where Does a Body End? (2019), unha película documental que, a través do retrato de Michael Gira, líder de SWANS, móstranos un retrato íntimo dunha banda única e irrepetible.
O festival trasladarase tamén por última vez esta noite á Sala Capitol cos concertos de Amorante, un amante da improvisación que define o seu proxecto como “música tradicional abordada dende un punto de vista contemporáneo”, e Javier Díez Ena, mestre do theremin, un dos primeiros instrumentos musicais electrónicos controlados sen necesidade do contacto físico do intérprete.
