Como cada agosto a Asociación Cidade Vella organiza o Feito a Man, un festival único que este ano eleva aínda máis o nivel con nomes como Sumrra, Xisco Feijoo ou Julián Maeso
O vindeiro martes 4 da agosto os Sumrrá abrirán o Feito a Man na Quintana e será outra forma de celebrar os seus 25 anos de traxectoria musical. Unha actuación que remarca o nivel do Feito a Man que, pola súa banda, chega á edición número vinte dúas.
O Feito a Man foi presentado no concello de Santiago coa presencia da concelleira de Capital Cultural, Míriam Louzao; Ánxeles Porto, directora do festival e Xacobe Martínez, membro de Sumrrá.
Ánxeles Porto reivindicou o formato do Feito a man, un formato que gusta ao público e funciona. No relativo á imaxe gráfica deste ano, deseñada por Antón Corsario, salientou a idea que ten o festival de involucrarse nos asuntos esenciais, en referencia á presencia no cartel de “Palestina libre” e “Altri non”.
En canto aos contidos, Ánxeles explicou que o festival repite a súa estrutura habitual onde destaca a variedade de xéneros das propostas musicais. Así mesmo por primeira vez o teatro de improvisación formará parte da programación.
Ademais, a Asociación Cidade Vella, organizadora do festival, colabora con varias ONG’s entre as que se atopa Greenpeace, da que este ano se acolle unha exposición fotográfica de rúa sobre o voluntariado en Galicia.
A programación contará con recoñecidas propostas galegas como Sumrrá, Nani García Trío, A banda da loba ou Santi Araujo; e algunhas chegadas doutras latitudes como Luiz Caracol (Portugal), Luciana Yuri (Arxentina) ou Atempo (Cuba).
Un dos sinais de identidade do festival é a diversidade que acolle a nivel de estilos musicais, así, poderase gozar de propostas que van dende o jazz até o trip-hop, pasando polo funk, o blues ou o folk.
O festival está organizado pola Asociación Cultural Cidade Vella que, desde 1987, reúne establecementos de hostalaría da zona vella compostelá cun claro compromiso coa cultura e coa cidade. É posible grazas ao apoio do Concello de Santiago de Compostela e a Deputación da Coruña e conta, ademais, con diferentes empresas coas que vén colaborando nos últimos anos como Casa de xantar O Dezaseis, Gadis, Froq ou Vincusys.
Actualmente, os establecementos organizadores son Camalea, Modus Vivendi, Atlántico, Chocolate, O Pozo, Casa das crechas, Literarios, A Gramola, Borriquita de Belém, Xuntanza, A Reixa, Embora, Momo… a rúa e O Galo D’ouro.
A Praza de Feixóo, a Rúa de Xelmírez, a Praza da Quintana ou San Paio de Antealtares son algúns dos catorce espazos da cidade histórica nos que se poderá gozar de música ao vivo.
O Feito a man 2025 dará comezo o día 4 de agosto na Praza da Quintana coas actuacións de Sumrrá e A banda das Crechas; e rematará o luns 25 na Fonte de San Antonio cunha mostra de alumnos e alumnas de WAX! Cultura DJ.
Deixamos por aquí o programa completo para que o podades descargar
