Compostela, 04/08/2026 – Esta semana comezou o Festival C que enche Compostela de distintas actividades durante o mes de agosto. Este ano co circo como especial protagonista. O Festival C bota a andar cunha primeira semana na que a danza, o circo, a narración oral, a música e a poesía sairán ao encontro da cidadanía en distintos espazos de Santiago.
Ata o venres 7 de agosto, a programación reunirá catro espectáculos de diferentes disciplinas e o obradoiro de circo para a rapazada, consolidando desde o primeiro día a aposta do festival por achegar a creación contemporánea e as artes de rúa a públicos de todas as idades.
Circonove abre o Festival C no parque de Galeras nun espazo de iniciación ao novo circo para a nenas e nenos de entre 3 e 14 anos. A través de xogos e dinámicas participativas, as participantes poderán achegarse ás acrobacias, os malabares, os equilibrios, o clown ou a creación de xoguetes circenses, nunha actividade que fomenta o traballo en equipo e a creatividade.
As sesións, que arrancan sempre ás 11.30 horas, estarán adaptadas a dúas franxas de idade: de 6 a 14 anos o luns e venres, e de 3 a 6 anos o mércores. A participación é gratuíta, con inscrición previa a través do enderezo electrónico circonoveoficina@gmail.com , onde se deberá indicar o nome e idade da persoa participante, así como os datos de contacto da persoa adulta responsable.
A programación escénica comezou onte na Casa das Máquinas con O que non se ve. Outras miradas, de Et Suseia Danza. Hoxe ás 18.00 horas, os Arcos do parque de Bonaval acollerán Hotel Paraíso, de Galeatro, unha proposta de narración oral para público familiar dentro do programa Apego. O espectáculo convida a percorrer un hotel no que cada estancia agocha unha emoción diferente, combinando contos, música e participación do público nun espazo pensado para compartir e socializar en galego.
O Festival C traerá mañá mércores, no paseo da Ferradura da Alameda, a inauguración ás 20.00 horas do ciclo Por que non cantades todas? coa actuación do Grupo de Música e Baile Tradicional Brincadeira.
O espectáculo reivindica o papel das mulleres do rural como creadoras e transmisoras da poesía popular oral galega, poñendo en valor un patrimonio que atravesa xeracións a través da música e da palabra.
Esta primeira semana culminará o xoves na praza da Quintana con Royal, un espectáculo de circo-danza cargado de ritmo, humor, emoción e acrobacias. A peza combina o clown poético de Arturo Cobas cos equilibrios en movemento e a danza de Paula Quintas para construír unha historia contada a través da linguaxe do corpo. Elegancia, enredos e complicidades danse cita nunha proposta fresca e chea de humor que fará rir, sorprender e emocionar a persoas de todas as idades.
Agás os obradoiros de circo, que precisan inscrición previa, todas as actividades son de acceso libre e de balde ata completar capacidade.
A información ao detalle de todos os eventos que conforman o Festival C está dispoñible na web compostelacultura . Os cambios que puidesen producirse por mor de calquera incidencia ou por causas meteorolóxicas serán anunciados nesa web e nas redes sociais de Compostela Cultura.
