Imaxe de arquivo (2022) do GES se Brión
Brión, 07/05/2026 – O Grupo de Emerxencias Supramunicipal (GES) de Brión é desde hai anos un dos máis importantes da bisbarra. Numerosas actuacións o converten nunha referencia de seguridade en todo tipo de situacións.
O servizo con base en Brión tivo que pechar recentemente durante unha xornada pola falta de persoal. Esta situación abriu unha preocupación pola situación laboral na que se atopa e que ata ese momento pasaba desapercibida.
O BNG de Brión reclama unha solución urxente á situación. A formación nacionalista considera “moi grave” este problema nun servizo “esencial para a seguridade da veciñanza de Brión e doutros concellos da comarca”, e advirte de que a falta de efectivos e a precariedade laboral “non poden seguir sendo a norma nun dispositivo de emerxencias”.
Desde o BNG sinalan que o GES, co que xa se ten reunido para coñecer as súas necesidades, presta unha atención fundamental en intervencións relacionadas con accidentes, incendios, rescates e outras emerxencias, polo que consideran “inadmisíbel” que o funcionamento do servizo dependa da realización constante de horas extraordinarias e de cadros de persoal insuficientes.
Hai uns meses o Bloque pediu explicacións no pleno polos gastos xurídicos derivados da sentenza que obrigaba o Concello a pagar horas extras aos traballadores do GES, por unha contía de máis de 165.000 euros.
A organización demanda ao Concello de Brión que adopte medidas inmediatas para garantir a estabilidade do servizo, reforzar os efectivos e asegurar unhas condicións laborais dignas para os traballadores e traballadoras do GES. “O dereito da veciñanza a contar cun servizo de emerxencias eficaz non pode sosterse sobre a precariedade laboral de quen garante esa seguridade”, sinalan desde o BNG.
A formación considera que esta situación evidencia a necesidade de abordar de maneira estrutural os problemas que arrastra o servizo e reclama responsabilidade institucional para evitar que episodios como o peche temporal do GES volvan repetirse.
