Compostela, 7 de xuño do 2022 – O Museo da Cidade da Cultura acolle desde hoxe unha exposición sobre a Vía da Prata baixo a óptica de 40 fotógrafos clásicos e contemporáneos.
Baixo o título de ‘A Vía da Prata. Aires do Sur’ a exposición mostra 140 instantáneas que mostran a historia da ruta. A exposición está comisariada por Lucía Laín estará aberta ata o 4 de setembro.
A mostra foi inaugurada este luns polo conselleiro de Cultura, Educación, FP e Universidades, Román Rodríguez, que destacou a contribución fundamental desta exposición “para impulsar un maior coñecemento e posta en valor da Vía da Prata e súa importancia na configuración da nosa identidade como punto de confluencia de culturas diversas”.
O conselleiro engadiu que “Por esta calzada camiñaron primeiro os romanos, comerciantes e exércitos árabes e cristiáns, e tamén chegaban á capital compostelá ofrendas e peregrinos que buscaban o favor do Apóstolo Santiago. Aínda hoxe, a autovía que toma o seu nome segue a ser un dos principais eixes de conexión entre o sur e o norte da Península”.
Do clásico ao moderno.
Entre as figuras clásicas incluídas na mostra cóntanse co galego José Suárez, Luis Agromayor, Martínez de Hebert, Jaimae Pacheco e tamén fotógrafos internacionais como Nicolás Muller, Otto Wunderlich, Jean Laurent ou António Passaporte, entre outros moitos.
Na parte máis contemporánea atopamos obras de Cristina García Rodero e Juan Manuel Castro Prieto, ambos premios nacionais de fotografía, xunto a nomes destacados como Carmenchu Alemán, Anna Turbau, Vicente López Tofiño, Atín Aya ou Fernando Manso e figuras emerxentes como Laura Martínez Lombardía, Yorgos Kaeste ou Javier Berasaluce.
Desde Galicia préstannos o seu ollar os ourensáns Antón Buciños, Brais Lorenzo, Tere Fernández e Miguel Muñiz, os vigueses Iñaki Matilla, Manuel G. Vicente e Roberto de la Torre e o compostelán Luis Otero.
Imaxes e letras
Nesta viaxe de sur a norte, a fotografía conxúgase con versos e fragmentos literarios de escritores e escritoras das nosas letras -Manuel Curros Enríquez, Vicente Risco, Sofía Casanova, Rosalía de Castro, etc.- e tamén doutros que desde a distancia atoparon a inspiración nas cidades, pobos e xentes que conforman a ruta da Vía da Prata, como Federico García Lorca, Manuel Machado ou Miguel de Unamuno. Este encontro feliz coa palabra escrita permite afondar na multiplicidade de sentimentos, lecturas e sentidos que transmite a imaxe, ofrecendo unha nova interpretación, por veces sorprendente na súa potencia evocadora, do traballo fotográfico.
Preservación do patrimonio
A exposición pon en valor o traballo de museos, arquivos e coleccionistas na conservación e transmisión do patrimonio vivo das Rutas Xacobeas. Neste sentido, a mostra inclúe fotografías pertencentes ao Arxiu Nacional de Catalunya, o Centro Português de Fotografía, o fondo Nicolás Muller do Archivo Regional de la Comunidad de Madrid, o Archivo Atín Aya, o Instituto do Patrimonio Cultural de España, a Fundació Institut Amatller d’Art Hispànic, o fondo Anna Turbau do Consello da Cultura Galega, o Arquivo Fotográfico Pacheco do Concello de Vigo, o Arquivo José Suárez, o Museo Arqueolóxico Provincial de Ourense e a Biblioteca Nacional de España, entre outros.
Dtas e horarios
A exposición poderá visitarse no terceiro andar do Museo Centro Gaiás ata o vindeiro 9 de setembro de 2022. Conta con entrada de balde, de martes a domingo e de 10,00 a 20,00 horas.
