Altri segue a xerar rexeitamentos e tamén informes e estudos sobre o risco medio ambiental que supón. Adega alerta en este caso da afectación a unha especie protexida e catalogada como vulnerable.
Os investigadores Iván Orois Longarela e Martiño-Fiz López Lindoso, veñen de publicar na revista Micolulus (número 12 – ano 2025) un artigo no que actualizan a distribución e caracterización do hábitat de Centaurea gallaecica, unha planta vascular endémica de Galiza.
Centaurea gallaecica é unha especie exclusiva das rochas ultrabásicas do centro do país, cunha distribución coñecida que se estende desde Teixeiro (Curtis) ata Cira (Silleda). A súa principal área de presenza localízase nas rochas serpentínicas da contorna de Melide, a zona ameazada polo proxecto de instalación dunha fábrica de celulosa da multinacional Altri.
O traballo de investigación revisa a bibliografía existente e as citacións históricas da especie, e logra duplicar a súa área de distribución coñecida. En termos de cuadrículas UTM de 10×10 km, pásase de 6 a 12 cuadrículas, mentres que a escala máis detallada de 1×1 km supón un avance aínda maior, ao incrementarse de 17 a 111 cuadrículas con presenza confirmada da especie.
O estudo inclúe tamén unha caracterización do hábitat no que se desenvolve Centaurea gallaecica e establece o seu rango altitudinal coñecido entre os 144 e os 751 metros sobre o nivel do mar. Esta planta atópase incluída no Catálogo Galego de Especies Ameazadas coa categoría de Vulnerable.
O feito de que estea catalogada implica a obriga de adoptar medidas correctoras no caso de que proxectos como o de Altri resulten compatibles tras un Estudo de Impacto Ambiental (EIA). Porén, os autores lembran que un EIA tamén pode, e debe. declarar incompatible unha actuación cando esta afecta de maneira directa á área central de distribución dunha especie ameazada.
Segundo os criterios da Unión Internacional para a Conservación da Natureza (IUCN), a perda ou recesión constatada da área de distribución de Centaurea gallaecica podería provocar o seu paso da categoría de Vulnerable (VU) á de En Perigo (EN), o que implica o aumento do risco de extinción por unha actividade económica evitable e que non precisa localizarse na área de ocupación desta especie endémica.
Os autores do estudo manifestan a importancia da conservación da biodiversidade, especialmente no caso de especies escasas ou ameazadas, nun contexto de crecente presión ambiental e cambio climático. Só a través do coñecemento rigoroso do territorio e das súas especies é posible valorar e protexer axeitadamente xoias naturais únicas como Centaurea gallaecica, patrimonio natural do centro de Galiza.
e 1
