A Estrada, 30 de novembro do 2020 – O operado municipal de internet da estrada, A Estrada Dixital, estudará a comercialización de fibra e telefonía.
A Estrada Dixital é unha actividade da Fundación Cultural A Estrada, unha entidade sen ánimo de lucro dependente Concello da Estrada. Na actualidade xestiona unha rede sen fíos que da cobertura a máis de 2.000 usuarios da Estrada, Vedra, Padrón e Teo.
Converterse en comercializador
A reunión do padroado o pasado xoves tratou unha iniciativa do BNG para converter A Estrada Dixital en operador virtual. O cambio permitiría comercializar fibra e telefonía móbil. Segundo explicou a representante nacionalista no padroado, Clara Iglesias, “a proposta foi ben acollida no seo do padroado e acordou estudar a viabilidade desta iniciativa”.
Iglesias explica que “Desde o BNG gustaríanos que o padroado tomase unha decisión xa o propio xoves, mais entendemos que o lóxico é estudala, analizala, ver as necesidades, os custes,… polo que daremos un tempo para este traballo se poida desenvolver”.
O BNG considera que é “urxente actuar para que A Estrada Dixital non se quede atrás, dados os cambios que se están dando no mundo das telecomunicacións, tamén no noso concello”.
A concelleira do BNG, Susana Camba, explicou que “esta iniciativa que presentamos xa no mes de setembro ten por obxectivo fortalecer o proxecto de A Estrada Dixital nun mercando cambiante, e ademais proporcionar un servizo de acceso a internet e telefonía móbil a prezos asequibles, desde unha entidade municipal, A Estrada Dixital, sobradamente coñecida entre os veciños e veciñas e con traxectoria e solvencia suficientes para desenvolver este traballo”.
