Bisbarra, 7 de marzo do 2024 – O BNG da Estrada esixirá ao concello que presente un recurso de alzada contra a declaración favorable do parque eólico de Xesteiras, obtida en outubro pasado.
A empresa reduciu os aeroxeradores de 8 a 6 para conseguir a declaración favorable pero iso non evita a preocupación da veciñanza. Os nacionalistas instarán, no pleno de hoxe, ao goberno local a que presente o recurso porque “sabe perfectamente o malestar e a inquietude que provoca este parque eólico nos montes de Vea”.
O voceiro do BNG da Estrada, Xoan Reices, explica que “O parque eólico de xesteiras non é só un atentado medioambiental, atenta contra o benestar dos veciños e veciñas de Vea, unha zona das máis poboadas do concello, que verán medrar nos seus montes a sombra alongada do espolio que enriquece o peto das eléctrica, mentres os veciños e veciñas perden calidade de vida”.
O nacionalista pon o foco na parroquia de Santa Mariña de Barcala que quedará “encerrada entre o parque eólico de Xesteiras e o de Castro Valente, separados por pouco máis de tres quilómetros de distancia”. Reices considera isto “intolerábel e o concello da Estrada non pode ficar calado, por moito que a legalidade vixente permita estes disparates”.
A problemática vai máis alá xa que, segundo o BNG, están en risco as traídas de auga potábel da que se nutren os veciños e veciñas “van verse afectadas infraestruturas públicas municipais como viais e alumeado público”.
O concelleiro indica que “o recurso de alzada do concello non pode ser un mero trámite, ten que estar ben fundamentado para parar este parque eólico; de non conseguilo con este recurso, xa avisamos que pediremos no pleno que o concello presente tamén recurso no xulgado”.
