As peticións para mellorar a estrutura e solucionar as humidades son recorrentes desde hai anos sen que polo momento pareza que se vaian solucionar.
O Centro de Saúde de Negreira hai tempo que precisa de arranxos a xulgar polas demandas reiteradas do concello. Pediuse en marzo pasado cunha concentración; en novembro do ano pasado o alcalde, Manuel Ángel Leis, reuníase coa Delegada da Xunta, Belén do Campo, por este e outros temas; antes, en marzo e xuño do 2022, o tema xa fora levado ao Parlamento galego e en esas segue o concello.
A deputada socialista Patricia Iglesias e o alcalde Ángel Leis acusan á Xunta de desatender as súas obrigas en materia sanitaria e piden a Rueda que actúe para que a veciñanza reciba atención en condicións axeitadas
Iglesias, visitou o Centro de Saúde de Negreira acompañada do alcalde, Ángel Leis, e do equipo de goberno local. Durante a visita, Iglesias denunciou o estado “lamentable” das instalacións e criticou a inacción da Xunta e do Sergas fronte a unha situación que cualificou de “inadmisible”.
“O que vemos doe”, afirmou a deputada socialista, facendo referencia a humidades nas paredes, espazos reducidos que impiden o acceso dunha padiola e deficiencias estruturais que comprometen a seguridade e a dignidade da atención sanitaria. “Todo isto sostido polo Concello, mentres a Xunta e o Sergas miran para outro lado”, lamentou.
Desde o PSdeG reclaman con urxencia a construción dun novo centro de saúde en Negreira que garanta unhas condicións axeitadas tanto para o persoal sanitario como para as e os pacientes. “A veciñanza merece un centro de saúde novo, digno e seguro, porque a saúde non pode depender da caridade”, subliñou Iglesias. “O Sergas, unha vez máis, invita pero non paga”, concluíu.
