O persoal mantén a negativa a celebrar o concerto de fin de curso previsto para este venres e culpa a ESPROADE, adxudicataria do servizo, por non sentarse a negociar.
As protestas na Escola de Música de Santiago continúan e a decisión de non realizar ningún evento máis ata conseguir, polo menos, unha mesa de negociación mantense. O concerto de este venres, habitual como fin de curso, non se celebrará e o persoal critica a actitude da empresa ESPROADE, adxudicataria do contrato.
Na última semana o persoal da escola recibiu o apoio da Xunta Directiva da Asociación de Alumnos e Nais e Pais de Alumnos A Tempo (AANPA A Tempo) da Escola. Nun comunicado expresan “o seu máis firme apoio ás xustas reivindicacións laborais e salariais do profesorado e do persoal de apoio da nosa Escola.”
A ANPA Atempo di tamén que “a calidade do ensino que ofrece a Escola é un reflexo directo da profesionalidade e vocación do seu equipo docente. Por iso, entendemos que unhas condicións laborais dignas e unha retribución xusta son imprescindibles para garantir a excelencia educativa e conservar un cadro profesional de alto nivel”.
Parón de actividades
Opersoal no seu último comunicado mantén a decisión de “non realizar ningún tipo de actividade fóra da nosa xornada laboral namentres a empresa adxudicataria do servizo, ESPROADE, non negocie e acepte as propostas de mellora nas condicións laborais que teñen enriba da mesa dende hai semanas”
A decisión inclúe a non participación en actos como o festival de fin de curso, cuxa realización, organización e execución recaen exclusivamente na empresa concesionaria que xestiona a escola. O festival previsto para este venres só coincide dentro da súa xornada laboral con tres docentes, dous deles directores de agrupacións, e cunha única persoa de apoio.
Os directores das outras nove agrupacións non participarán, ao atoparse fóra do seu horario laboral. Esta realidade compromete gravemente o desenvolvemento normal do concerto de fin de curso. A empresa comunicou que continuará ca realización do acto, pero non ofreceu ningunha información clara sobre quen asumirá a dirección das agrupacións, quen prestará apoio técnico nin como se desenvolverá o concerto.
No comunicado o persoal explica que “os traballadores non podemos dar resposta ás familias sobre o que ocorrerá, xa que, malia solicitar formalmente aclaracións dende o pasado venres 6 de xuño, non obtivemos contestación”.
Os traballadores “lamentan o impacto que está tendo a situación” e queren “agradecer enormemente ao alumnado e ás súas familias o apoio, a empatía e a compañía que nos teñen trasladado durante estes días. Sentímonos arroupados e comprendidos, e iso dálle sentido á nosa loita por unhas condicións laborais dignas que garantan tamén un servizo público de calidade”.
Finalmente din os traballadores da escola que “se o curso remata sen avances nin solucións claras, anunciamos xa que valoraremos iniciar todas as accións necesarias, incluída unha folga indefinida ao comezo do vindeiro curso escolar. Non deixaremos de defender a dignidade do noso traballo nin o futuro desta escola como proxecto público e de calidade”.
About the Author
