Monmento en que asinan o acordo s deputada de Cultura da Deputación da Coruña, Natividade González; a deputada de Cultura da Deputación de Lugo, Iria Castro; e a presidenta do Consello da Cultura Galega, Dolores Vilavedra.
Compostela, 13/07/2026 – A Deputación da Coruña, a Deputación de Lugo e o Consello da Cultura Galega formalizaron un convenio de colaboración para desenvolver o proxecto “Escola, cultura e territorio”.
A iniciativa nace coa vontade de promover e visibilizar as experiencias culturais que se levan a cabo no ámbito rural. “Escola, cultura e territorio” estará regrado por un acordo asinado pola deputada de Cultura da Deputación da Coruña, Natividade González; a deputada de Cultura da Deputación de Lugo, Iria Castro; e a presidenta do Consello da Cultura Galega, Dolores Vilavedra.
“Escola, cultura e territorio” nace na procura de entender a cultura como unha ferramenta clave para o fortalecemento da identidade colectiva, a construción de comunidade e a preservación da memoria.
Neste marco, o proxecto pretende favorecer o coñecemento, a posta en valor e o intercambio de iniciativas que conectan educación, cultura e territorio, contribuíndo ao dinamismo social e cultural das zonas rurais.
A proposta contará cun total de 6 actividades de formación e visibilización, que organizarán as tres entidades, e que comezan hoxe mesmo co Encontro de Boas Iniciativas Culturais que se celebrará no Pazo de Tor, en Monforte, coa participación dunha vintena de asociacións e profesionais da cultura organizado pola Deputación de Lugo.
Desde a Deputación da Coruña, promoveranse a final de ano unhas residencias de proxectos culturais no Pazo de Mariñán, e un programa centrado no traballo cultural coa mocidade na Costa da Morte. Pola súa banda, o Consello da Cultura ofrecerá un programa de formación en cultura para cargos públicos e unha iniciativa dixital para visibilizar proxectos culturais co enfoque de ‘Escola, cultura e territorio’.
A deputada de cultura destacou a importancia da colaboración institucional para impulsar políticas culturais que cheguen ao conxunto do territorio e reforcen o papel do rural como espazo de creación, participación e transmisión do patrimonio material e inmaterial.
De “Escola, cultura e territorio” Natividade González di “Trátase dunha iniciativa pioneira de colaboración institucional que evidencia o compromiso compartido das administracións coa cultura e co territorio. Non existen practicamente precedentes de cooperación entre dúas deputacións galegas para impulsar unha iniciativa cultural destas características, polo que este convenio supón un paso importante na suma de esforzos e recursos para desenvolver proxectos de interese común”.
A responsable de Cultura na Deputación de Lugo Iria Castro valorou a oportunidade “de traballar conxuntamente para fortalecer o ecosistema cultural galego desde o ámbito local, tendo en conta que cada institución atende realidades demográficas e socioeconómicas diferentes. Nas comarcas de Lugo, cunha poboación dispersa e un territorio maioritariamente rural, agroman proxectos moi interesantes dos que aprender”.
Pola súa banda a presidenta do Consello da Cultura Galega, Dolores Vilavedra, afirmou que este convenio é “un exemplo modélico de colaboración institucional para impulsar políticas culturais que cheguen a todo o conxunto do territorio e superar as asimetrías que existen entre o rural e o urbano, reforzando o papel do rural como un espazo activo, dinámico, de memoria”. Ademais, sinalou que permite “deseñar unha folla de ruta que xorde dunha convicción: a cultura é unha ferramenta de cohesión social”.
