Bisbarra, 13 de decembro do 2024 – A batalla dos eólicos continúa e faino en varias frontes; a xudicial, a administrativa e nas protestas a pe de rúa.
Hai un mes a xustiza paralizaba 3 novos proxectos eólicos en Terra de Montes tal e como contamos en Lindeiros. ADEGA é o principal combatente con continúas campañas de recadación de fondos para presentar recursos xudiciais que, na maioría dos casos, son admitidos e provocan paralizacións.
Alegacións en Ordes polos eólicos de Monte Inxerio
Nos concellos son os gobernos municipais ou os grupos da oposición os que alertan dos problemas e presentan alegacións. Agora tócalle a quenda ao BNG de Ordes que advirte da proximidade ás vivendas, menos de 500 metros, do proxecto Monte Inxerio.
O BNG ordense ven de presentar unha serie de alegacións por este motivo. O fixeron o portavoz, Pablo Vidal, e o concelleiro Avelino Candal, contra a declaración de utilidade pública, cuxa resolución favorable abriría a posibilidade de expropiar os terreos precisos por parte da promotora.
Os nacionalistas sinalan que coa entrada en vigor do P.X.O.M. de Ordes, “modificáronse as delimitacións de solo de núcleo rural”, detectando “que o aeroxerador MI-06 atópase proxectado a menos de 500 m do núcleo rural de Meitufe (05.12_2)”. A este respecto Candal advirte que “estase a incumprir coa distancia mínima establecida pola lexislación vixente”.
Por outra banda, desde o BNG de Ordes sinalan que o proxecto reduciu o número de aeroxeradores “dos once inicialmente previstos, cunha capacidade de 3,465 MW cada un, a oito de 5,2 MW”. Para Pablo Vidal, portavoz da formación nacionalista, isto supón “unha modificación substancial da potencia nominal dos aeroxeradores,o que altera as características técnicas do parque eólico, polo que resulta preciso efectuar un novo informe acústico ao quedar invalidado o efectuado na declaración de impacto ambiental”. Neste sentido, Vidal considera que “ao incrementar a potencia e o tamaño das pás dos aeroxeradores, o novo informe de ruído podería derivar nunha modificación da posición formulada para os aeroxeradores, ou incluso unha nova declaración de impacto ambiental que podería incluso rematar sendo desfavorable”.
Protesta ante o Parlamento
Como dicíamos ao principio a loita segue tamén a pe de rúa. A coordinadora Eólicos asi NON concentrarase o vindeiro martes día 17, as cinco da tarde, fronte ao Parlamento de Galicia para protestar polo “constante acoso do PP sobre a veciñanza ameazada pola invasión eólica”.
Eólicos así NON elixiron esa data porque previsiblemente apróbese a nova lei de acompañamento dos orzamentos para 2025. A coordinadora considera que esta lei contén “unha batería de reformas legais coas que intentar fulminar calquera posibilidade de defensa das poboacións e comunidades afectadas e, por outro, burlar as disposicións xudiciais polas que ducias de proxectos eólicos se atopan paralizados cautelarmente”.
A Coordinadora Eólica Así Non acusa a Xunta de Galicia de utilizar os recursos públicos para exercer o que denomina “auténtica violencia institucional” contra as comunidades de veciños e veciñas afectadas polo espolio eólico, “ás que somete a un continuo acoso administrativo que se manifesta de varias formas: a través da sobresaturación de proxectos ou do empacho administrativo, da desregulamentación e xeración de inseguridade xurídica, do recorte dos dereitos de acceso á información e á xustiza, ou da difamación e criminalización da protesta social”.
