Este martes a coordinadora Eólica así NON Concentrouse diante do Parlamento de Galicia para protestar polas reformas da lei que declaran compatibles os parques eólicos coa paisaxe.
A Coordinadora denunciou a “trapela lexislativa” que supón a Lei de Acompañamento aos Orzamentos, aprobada onte no Parlamento galego, e advertiu sobre “as novas ameazas que implica a anunciada Lei de Administración Ambiental Simplificada”.
Durante a concentración de Eólica así NON desenvolveuse unha acción simbólica para denunciar “a vontade do PP de ocultar aos ollos da cidadanía os evidentes impactos paisaxísticos e ambientais do actual modelo de desenvolvemento eólico”.
Os manifestantes denuncian tamén que se incorporan modificacións substanciais “sen debate público, sen transparencia e sen participación social, e que afectan directamente a protección da paisaxe e os dereitos das poboacións afectadas pola invasión eólica”.
Tal e como recolle o manifesto publicado por Eólica así NON, lido durante a concentración, os cambios na lei “dilúen o significado real da paisaxe e contravén o Convenio Europeo da Paisaxe, a lei galega da paisaxe de 2008 e as directrices de calidade paisaxística de Galiza, ao deixar sen protección espazos de alto valor ambiental”.
Engaden que “a ofensiva contra o territorio compleméntase coa presentación da Lei de Administración Ambiental Simplificada, unha nova lei depredadora que reduce a terra a unha mera cuestión administrativa, e que muda a protección ambiental pola súa simple administración”.
A través desta protesta, a Coordinadora Eólica Así Non quere “reafirmar que a paisaxe non é un elemento accesorio nin un obxecto administrativo, senón unha parte inseparable da identidade do pobo, da memoria, da natureza e das persoas que habitan o territorio” e insistiu en que, por moito que se modifiquen as leis, a cidadanía non renunciará a defender a súa terra e a súa paisaxe. “Non imos renunciar a ser nós”.
