Bisbarra, 4 de febreiro do 2025 – Despois de suspender as protestas do domingo 26 pola alerta meteorolóxica, Eólica Así Non! traslada as mobilizacións a este domingo, 9 de febreiro.
Eólica Así NON! fai un novo chamado á sociedade para “denunciar o modelo de espolio enerxético que promove a Xunta de Galiza”. Un modelo que “ten como principal obxectivo beneficiar o capital, á costa de xerar graves impactos medioambientais e expulsar a cidadanía da toma de decisións.
A Coordinadora denuncia, ademais, a falta de respecto polas decisións xudiciais coa aprobación das últimas reformas legais. Segundo Eólica Así NON! teñen como obxectivo “dificultar que a poboación se poida defender, tanto no eido administrativo como xudicial, diante destes proxectos agresivos e depredadores do territorio, destinando recursos públicos para exercer “violencia institucional” contra as comunidades veciñais afectadas”.
Eólica Así Non! aposta por unha nova planificación eólica real “que ordene a explotación desta enerxía no territorio, con obxectivos sociais e ambientais, que faga partícipe ao pobo galego e non se desenvolva en función dos intereses das grandes multinacionais enerxéticas”.
Na bisbarra de Compostela a mobilización terá lugar no concello de Val do Dubra, diante da Casa Consistorial en Bembibre, as 12 do mediodía.
