Bisbarra, 21 de novembro do 2023 – A coordinadora “Eólica así NON” congregou a centos de manifestantes diante do Parlamento de Galicia para protestar contra as reformas lexislativas que afectan aos proxectos eólicos.
A coordinadora explica que ditas reformas “pretenden sortear as sentenzas xudiciais do TSXG que están a paralizar proxectos eólicos ilegais, así como entregar definitivamente os recursos naturais do país ás eléctricas e mineiras”.
A Lei de acompañamento dos orzamentos 2024 declara aos proxectos eólicos autorizados desde o 30 de decembro do 2022 de “Interese público superior”. Esta Lei foi tramitada por vía de urxencia e a coordinadora considera que o seu obxectivo é “facer prevalecer a explotación enerxética do vento fronte a outras actividades económicas estratéxicas, a preservación do medio ambiente e o aproveitamento ordenado dos recursos naturais.
Ao berro de “as leis do Capital non son de interese xeral”, os colectivos e organizacións que conforman o movemento “Eólica Así Non” acusaron ao Partido Popular de “prevaricar ao reincidir na disposición de leis que recortan dereitos sociais e de participación pública e que favorecen a destrución do patrimonio ambiental e cultural”.
A presunción de “interese público superior” facilita a tramitación de renovábeis e considera por defecto os polígonos eólicos compatíbeis co medio ambiente, agás argumento en contra. A medida segundo a coordinadora “relega á Xunta da súa responsabilidade fiscalizadora nas avaliacións de impacto ambiental dos proxectos enerxéticos e deposita a tutela dos recursos públicos e a carga da proba na cidadanía, de forma, que teña que ser o pobo galego o que demostre a incompatibilidade de moitos dos macroeólicos xa autorizados”.
Lei de beneficios
Ao tempo, atópase en avaliación no Consello Económico e Social o anteproxecto da “Lei de promoción dos beneficios sociais e económicos dos proxectos que utilizan recursos naturais de Galiza”.
Desde “Eólicos asi NON” explican que está dirixida “unicamente a facilitar o camiño das grandes corporacións empresariais cara á explotación dos recursos naturais que son de todas e todos. Tal e como se concibe, esta lei impide á Administración pública exercer un control efectivo sobre o aproveitamento de recursos naturais básicos para a supervivencia do pobo galego (enerxía, auga, minerais…)”.
Os manifestantes engaden que “Estas novas reformas legais constitúen na práctica o abandono da Xunta da súa función executiva a prol do interese xeral e o seu evidente sometemento ao servizo do capital privado, deixando en mans das grandes especuladoras o presente e futuro do noso país”.
Desde a Coordinadora confían en que “a mobilización social, o control do poder público exercido pola cidadanía e a independencia da Xustiza consigan deter os efectos perversos deste ronsel antidemocrático de reformas lexislativas, promovidas por un PP que, a cada paso que dá, deixa máis claro para quen está a gobernar”.
