Eleccións 23, 12 de maio – Aínda que como contabamos onte algúns xa comezaron a pegada con tempo dabondo, a pasada noite foi a saída oficial a unha campaña que nas última semana non se distinguía da precampaña.
Mentres a maioría manteñen a tradición do cubo e a brocha, outros optan por modernos paneis para descubrir a foto do candidato. En Compostela a zona vella foi o espazo elixido polos candidatos para a pegada estando os catro principais a cinco minutos uns de outros.
O Psoe organizou o acto na praza de Mazarelos. Xosé Sánchez Bugallo estivo acompañado polo ministro de sanidade, José Miñones, e o Secretario Xeral do partido en Galicia, Valentín González. Bugallo dixo ir a por todas e engadiu que “Despois de catro anos tan duros, con pandemia e guerra polo medio, temos os mellores datos de emprego, os maiores niveis de renda, a maior afluencia de visitantes na cidade e vivimos a máis grande expansión de solo industrial dos últimos tempos” e agora “queremos máis, prepararnos para a gran transformación”
O Partido Popular organizou o acto na Praza do Obradoiro, na escalinata que baixa cara a rúa de Raxoi. Borja Verea chegou co presidente da Xunta, Alfonso Rueda, e a Secretaria do Partido, Paula Prado. Verea lembrou durante a presentación da súa candidatura que “hoxe todo o mundo sabe que solo hai dúas opcións: ou un goberno en forma de tripartito perdedor; ou un goberno de futuro, o noso, para levar Santiago ao século XXI”.
Compostela Aberta preparou un espazo nas Casas Reais, nun lateral da súa sede electoral. María Rozas estivo acompañada por Martiño Noriega e dixo que “Compostela Aberta é o único garante de que Santiago non volva aos anos negros do PP nin se manteña no gris de Bugallo”. Rozas engadiu que se trata “da candidatura da xente que non entende a política sen escoitar e ir da man dunha veciñanza que se sente esquecida e apartada”.
Finalmente o BNG estivo na praza do Toural. Oreti Sanmartín estivo acompañada por Ana Pontón e dixo que o BNG de Compostela “vai ter un resultado histórico este 28M e faremos realidade conseguir o apoio necesario para gobernar desde a Alcaldía e mudar o gris que envolve o concello nun arco da vella de cores de compromiso e de transformación”.
Expediente da Xunta electoral ao BNG de Teo
Si onte contabamos que o BNG de Teo comezara a poñer carteles hoxe engadimos que algúns deles levaban a cara do candidato e o lema electoral. A Xuta electoral enviou onte unha comunicación na que ordena a retirada de todo o colocado e abre un expediente que pode rematar cunha sanción económica.
