Compostela
Santiago segue sendo a que xera máis actividade de cara ás eleccións. Cada día hai convocatorias e mesmo a actividade informativa normal está case parada.
Compostela Aberta presentou este martes a proposta de creación duna concellaría de modernización administrativa. A candidata María Rozas explica que se trata de “un departamento que funcionará de maneira transversal e que permitirá simplificar, homoxeneizar e axilizar os procedementos administrativos”.
Rozas engade que esta concellería “disporá as ferramentas necesarias para afrontar algúns dos graves problemas que ten o Concello de Santiago e que máis lle afectan directamente á veciñanza, como son os atrasos na concesión de licenzas ou no pago de facturas”. Ao tempo, dixo “Compostela Aberta impulsará unha tarxeta cidadá que tamén contribúa a facilitar a relación dos veciños e veciñas coa administración e o seu acceso aos servizos municipais”.
Pola súa banda o Partido Popular tomouse unha xornada máis tranquila pero hoxe presentará a toda a candidatura aos medios de comunicación a última hora da tarde. Nas últimas semanas estivo presentando distintas propostas das que podemos recuperar, entre as máis recentes, a de benestar animal. Para o candidato Borja Verea cada barrio debería contar cun parque canino “así abriranse novos espazos nas zonas onde aínda non conte con este tipo de instalacións, e levarase a cabo unha reformulación e mellora dos xa existentes”.
Tamén promoverá unha guía “PetFriendly” para que todos aqueles temas relacionados cos animais queden unificados e se lles poidan dar difusión: restaurantes, cafeterías, saúde e beleza, aloxamento, zonas de esparcemento, actividades lúdicas, etc.
O Psoe segue mostrando o deseño urbanístico que quere para a cidade e onte falou da reurbanización da Rúa Carlos Maside, da García Lorca o a reforma do pavillón de Vite. Ao mesmo tempo o candidato Xosé Sánchez Bugallo fala de “coser a cidade” e mesmo contempla a reforma da rúa Romero Donallo cunha berarrúa central coa intención de enlazar Conxo co centro da cidade.
O BNG enzarzouse nos últimos días nunha disputa sobre a titularidade de Peleteiro. Consideran os nacionalistas que pertence á Sareb polo que pode ser reclamada e a concelleira de urbanismo, Mercedes Rosón, explicou que en realidade pertence a un fondo inversor. Onte a candidata do BNG, Goretti Sanmartín presentou a documentación que acredita que o 100% da titularidade da propiedade da parcela de Peleteiro é de Árqura Homes, a promotora inmobiliaria da SAREB. “Xa abonda de sementar dúbidas por parte do PSOE sobre esta propiedade e sobre a posibilidade que se abre para ampliar o parque de vivenda protexida; esixímoslle que demostren a defensa dos intereses da cidade e se poñan a traballar para conseguir que prospere esta medida anunciada polo Goberno do Estado e que pode beneficiar Santiago de Compostela con esta cesión de solo”, advertiu.
Teo
A voceira do BNG, Ana Pontón, pasou por Teo para apoiar a reivindicación dun centro de día para o concello e a candidatura de Eloi Devesa á alcaldía. Devesa lembrou que a construción de este servizo era algo comprometido polo goberno autonómico do bipartito que quedou en nada coa chegada do Partido Popular
Lindeiros aproveitou para preguntar pola lexislatura en Teo, complexa e que remata con 4 voceiros distintos en catro anos. Ana Pontón preferiu non entrar en temas locais e Eloi Devesa declarou mirar para o futuro más que para o pasado
Negreira
En Negreira o Psoe ven de presentar o seu slogan para a campaña electoral “O mellor para Negreira”. O candidato e actual alcalde, Manuel Ángel Leis, fala dunha campaña en positivo e di que “Os feitos de todo o realizado estes catro anos están aí, creo con honestidade que representamos a máis seria proposta de goberno para Negreira” e garante “continuar a traballar cada día para mellorar a vida dos nosos veciños e veciñas”.
