Eleccións 23, 3 de abril – Espazo Común e Partido Popular presentaron as súas candidatas a alcaldía do concello de Ames, Luísa Feijoo e Oliva Agra serán as mulleres que opten ao posto.
A Casa da Cultura do Milladoiro serviu de recinto para as dúas presentacións. O Partido Popular o venres pasado pola tarde coa presenza de Diego Calvo e Paula Prado. Espazo Común o sábado pola mañá con Pachi Vázquez como convidado.
Dúas candidatas
Luísa Feijoo e Oliva Agra deron a sensación de dúas candidatas con capacidade de dialogar e veñen a renovar a política de Ames. As dúas con experiencia na vida orgánica do concello e tamén sabendo o que é quedar apartadas da primeira liña por decisións políticas. Afrontan con ilusión unha oportunidade onde moita xente marcharía para casa e iso, de cara ao votante, e sempre de agradecer.
Espazo Común pensa en crecer
Foi precisamente Pachi Vázquez o primeiro en intervir no acto de Espazo Común que foi presentado pola número dez, Carmela Pardal. Si a presentadora definiu a candidatura como unha “película independente pero que opta aos premios como o resto” , Vázquez dixo que Espazo Común era un partido de autor e que “as cousas grandes veñen de algo pequeno” para rematar engadindo que tras as eleccións terían que sentarse en clara alusión a unha candidatura autonómica.
Luísa feijoo comezou falando de “escoita activa” e explicou que as ideas do socialismo as ten oi interiorizadas. Falou de feminismo, pobreza, ou emigración e lembrou que cando cambiou o alcalde cambiaron tamén as formas e pasouse dun equipo a algo moito máis personalista.
O PP facendo equipo
Oliva Agra comezou agradecendo todos os apoios e lembrando o traballo dos últimos anos, explicando ademais que “Nunca me costó tanto hacer un discurso. Conforme se acercaba esta fecha, más difícil se me hacía escribir todo esto”.
Agra demostrou no seu discurso ser unha candidata de “partido” e sen mirar atrás falou de que “uno de los mayores honores que se puede obtener es ser candidata a una alcaldía”. A candidata tivo tamén un emotivo recordo para o seu pai “Y mi agradecimiento especial a una persona que ya no está entre nosotros. Que fue quien me inspiró para dar este paso: mi padre José Ramón Agra”.
No resto da súa intervención Oliva Agra explicou o seu proxecto dicindo que quere un concello que teña en conta aos xoves, que reúna tradición e progreso e que sexa “un Ames inclusivo”.
