Eleccións 23, 30 de marzo – Xosé Sánchez Bugallo por Santiago e Anxo Arca por Padrón foron presentados como candidatos socialistas de Compostela e Padrón á veciñanza de ambos os dous concellos.
Santiago
Esta pasada noite Sánchez Bugallo presentou ao seu equipo nun acto ao que asistiron cerca de mil persoas e no que participou o Secretario Xeral socialista, Valentín González Formoso. No acto introducíronse aos poucos todos os membros da lista electoral ata chegar ao número 1.
Bugallo dixo que desde que comezou en política este fora “o tempo máis duro, o máis esixente; no esforzo físico e no emocional”. Para o actual alcalde “non vale nin un Santiago duns nin doutros, só vale o de todas e todos. Ese Santiago plural e inclusivo só o podemos construír nós”.
Bugallo puxo tamén en valor o traballo realizado dicindo que “Ás veces non somos capaces de ver o traballo feito, pero xuntos e xuntas conseguimos moitas cousas: o impulso de grandes contratos aparcados e que estaban en precario desde hai anos, a redacción dun mapa para construír un proxecto de cidade claro na Axenda 2030 e no Plan de Mobilidade, e modernizar unha administración que en 2019 estaba completamente obsoleta.
Padrón
Anxo Arca, o candidato socialista en Padrón, estivo acompañado no acto polo líder provincial do PSdeG, Bernardo Fernández Piñeiro, e a deputada autonómica Noa Díaz. Anxo Arca foi moi crítico cos gobernos do Partido Popular dicindo que “é hora de rematar con esta longa noite de 12 anos que mantén ao noso municipio nunha lamentable situación de atraso e abandono”.
O socialista insistiu en que o goberno de Antonio Fernández “carece de proxecto, acumula oportunidades perdidas e a súa xestión presenta graves carencias tanto no ámbito urbano como no rural”.
Neste sentido, Arca manifestou a súa preocupación “pola falta de innovación nas actividades municipais, a perda de poboación, o abandono do casco histórico e do patrimonio cultural, a inexistencia dun plan xeral acorde cos tempos, o descoido das aldeas ou a carencia durante dous anos de oficina municipal de Turismo, coincidindo xusto cando se celebraban dous anos santos seguidos”.
