Os partidos aceleran o ritmo e aínda quedan presentacións pendentes. O último en chegar foi Espazo Común que con Manolo tallón á cabeza presenta a súa candidatura á alcaldía de Teo este venres.
Nas sedes comezan a aparecer cubos e brochas porque a pegada de carteis no século XXI mantense como tradición sen que ninguén crea moito na súa utilidade. Ao mesmo tempo comezan as gravarse as megafonías que atronaran as rúas desde o día 12.
Mitin pos comida
En Padrón o Psoe denuncia a “falta de escrúpulos” do PP por presentar a súa candidatura a continuación, e no mesmo lugar, da festa dos maiores. O pasado sábado celebrouse na vila a festividade de San Xoán de Raio e con ese motivo o concello organizou a tradicional comida dos maiores.
O Psoe considera que “O PP emprega descaradamente as institucións que goberna en beneficio propio” por facer coincidir a presentación das candidaturas de Padrón, Rois e Dodro a continuación da festa da terceira idade e no mesmo lugar.
Almorzos
Este foi un luns de almorzos en Compostela. O Candidato do Partido Popular, Borja Verea, reunía a 300 persoas, moitos empresarios, no Hotel Porta do Camiño as nove da mañá con convocatoria a medio incluía.
Xunto a el o Conselleiro de Industria Francisco Conde que definiu ao candidato como un corredor de fondo que chega coa experiencia necesaria. Verea anunciou na súa intervención a construción dun ambulatoria, no Restollal, que dará servizo ao Castiñeiriño con 6 consultas de medicina, 6 de enfermería, 1 de pediatría e aparcadoiro soterrado.
O Psoe convoca aos medios un pouco despois na súa sede electoral, tamén con café e pasteis. O candidato Sánchez Bugallo asegurou estar cada día “máis contento e ilusionado” ante as eleccións ás que se presenta avalado por datos “temos os mellores datos de emprego da historia, somos un dos 20 concellos mellor xestionado de España segundo un informe elaborado polo ICGEA, temos uns servizos públicos renovados e impulsamos de novo a actividade comercial e turística da cidade”.
Pola súa banda Compostela Aberta ven convocando aos medios de xeito regular para presentar as súas propostas. Este luns foron as de vivenda e a candidata María Rozas falou de crear unha nova empresa municipal que “promova a construcción de vivendas a prezo taxado nos solares municipais, pero sobre todo que poña vivendas baleiras no mercado do alugueiro, a prezos sociais”.
Finalmente o BNG dedicou o luns a presentar un avance do videoclip de campaña titulado “O mundo é aquí”, cunha canción que “impregna de sensacións sobre o inicio de algo novo, con esperanza e apelando ao futuro de Santiago de Compostela en alusión á chegada do equipo liderado por Goretti Sanmartín ao Goberno municipal”.
A canción introduce o lema ‘Santiago merece máis’ e diríxese ás persoas “co corazón en Compostela”.
Touro becas
A candidata socialista en Touro, Gemma V. Lopez, presentou proposta de becas para o municipio si chega a gobernar “ningún estudante deixara os estudos por motivos económicos”. A candidata dixo que porá en marcha numerosos proxectos que son “realistas e Realizables debido a que emanan desde o coñecemento das necesidades da poboación Tourense”.
