Eleccións 23, 25 maio – Seguen aparecendo sucesos que cuestionan o comportamento de moitos dos políticos que participan nas eleccións, son casos illados pero tamén malos exemplos de democracia.
En esta campaña, como en outras, xa vimos rotura de publicidade entre partidos e mesmo a colocación antes do comezo da campaña. Agora falamos de desacreditar de calquera forma a un candidato e do presunto uso de datos privados para gañar votantes.
En Santa Comba o BNG esixe responsabilidade penais e políticas por unha campaña de difamación contra o seu candidato, Juan Sixto. O responsábel de Organización do BNG, Bieito Lobeira, acusou ao PP de “prácticas caciquís e mafiosas” e instou a Alfonso Rueda a que “pare xa este despropósito porque en política non todo vale”.
Ademais da denuncia que o candidato Juan Sixto presentou na Garda Civil, o BNG dirixiuse tamén á Xunta Electoral para que se posicione sobre uns feitos “e extrema gravidade que afectan ao proceso electoral ademais da integridade persoal do candidato”.
O propio Juan Sixto falou na súa intervención dunha “estrutura organizada” que ten como obxectivo “meter medo nunha campaña completamente carroñeira mais non nos van facer calar”.
Uso de datos privados
Un pouco máis cerca de Compostela, en Trazo, o PSdeG-PSOE presentou esta mañá ante a Xunta Electoral de Santiago unha denuncia contra o Partido Popular de Trazo polo uso do padrón municipal de habitantes.
Os socialistas de Trazo acompañan a denuncia con documentos gráficos nos que se evidencia que o candidato número 3 do PP en Trazo está a realizar visitas á veciñanza do concello levando á vista no parabrisas do seu coche particular o padrón municipal de habitantes, onde figuran datos protexidos de todos os veciños de Trazo como nome e apelidos, dirección e persoas que residen en cada domicilio e data de nacemento.
“Non pode ser que os candidatos do PP anden visitando as casas co censo na man, é un asunto moi grave e unha clara vulneración da Lei electoral e da Lei de protección de datos”, afirma o candidato socialista á Alcaldía de Trazo, Eugenio Pazos, quen advirte de que “iremos ata o final do asunto para saber de onde saíron estes censos, canto tempo leva empregando o PP o padrón de habitantes de Trazo e con que finalidade”.
