Bisbarra, 13 de xaneiro do 2023 – Mentres que en algúns concellos aínda hai dúbidas sobre os candidatos ás alcaldías en Teo o Psoe adiantase a todos e aproba, e presenta, parte da lista electoral.
Uxía Lemus mantén o “núcleo duro” da agrupación tendo de número dous a José Manuel Elías e de tres a Mayte Argibay. Roberto Moniño, concelleiro tamén en esta lexislatura, deixa a política activa aínda que concorrerá nos últimos postos da candidatura.
Lemus incorpora ademais nomes vinculados a áreas como o rural, Pablo Salgueiro e Mar Doce; servizos sociais como Montse Regueiro ou Rosa Martínez ou deportes como Nisar Maarawi.
O socialistas explican que se trata dun equipo que se define pola “capacidade de traballo e o sentido común”. Uxía Lemus engade que “hai que poñer o foco na veciñanza, hai que dialogar e entenderse para logo actuar”.
Sobre o equipo Lemus di tamén que “o obxectivo de este equipo é compatibilizar a imprescindible volta á estabilidade do goberno municipal de Teo cunha xestión ambiciosa. O concello non pode seguir perdendo oportunidades, hai que avanzar e deixar atrás esta etapa de imposición, debilidade e nula capacidade de xestión como vemos cada semana”.
Teo é un dos concellos cunha situación máis cambiante de cara as eleccións. Só manteñen candidato Psoe e PP. María López ocupa o posto do actual alcalde, Rafa Sisto, en Son de Teo aínda que cambian o nome polo de “Proxecto común”. Pola súa banda o BNG muda tamén o candidato e presentará a Patricia Castelao, número catro da lista hai catro anos e actual voceira despois de que dimitiran os dous anteriores na actual lexislatura.
