Eleccións 23, 23 de maio – Lembrando a xa famosa frase, da a sensación de que estamos tendo debates por enriba das nosas posibilidades; mesmo xa se debate sobre debates.
Este luns estaban previstos dous debates en Compostela, un da CRTVG e outro da Cadena SER. Foi o de Radio Galicia o que se celebrou finalmente no Salón Teatro pero a coincidencia na data abriu unha polémica que mesmo pode rematar na Xunta Electoral.
O debate da SER estaba previsto desde o mes de marzo. Cando a CRTVG anunciou o plan de medios desde Psoe e BNG advertiuse da coincidencia sen que a compañía pública fixera ningún cambio. A polémica sobre os debates creceu cunha nota de prensa do Partido Popular na que se di que o candidato Borja Verea “lamenta que se tivera que cancelar o debate que tiña que ter lugar hoxe ás 10 da mañá na CRTVG. Ao ser o único candidato que confirmou a súa asistencia, foi desconvocado e finalmente non poderá participar”.
O BNG denuncia “a mentira e manipulación do PP e da CRTVG á hora de xustificaren a cancelación do debate electoral”. Os nacionalista explican que Borja Verea tiña confirmada a asistencia ao debate da SER desde un mes antes polo que era imposible que fora a audir ao da CRTVG.
Segundo publicaba onte Europa Press o BNG ten previsto presentar unha denuncia ante a Xunta Electoral. A axencia tamén contaba que os nacionalistas presentaran un recurso ao coñecerse o plan de medios da CRTVG solicitando, entre outras cousas, a modificación da data do debate de Santiago pero non foi atendido.
