Eleccións 23, 24 de febreiro – O Bloque Nacionalista Galego de Teo elixiu Eloi Devesa como o candidato que relevará a Patricia Castelao trala renuncia, por razóns persoais, da concelleira.
A candidatura de Devesa chega nunha das peores lexislaturas, no eido político, para o BNG de Teo. Patricia Castelao é a terceira voceira de esta lexislatura tras substituír a Manuel Barreiro que ocupara o posto deixado por Manuel Anxo Fernández.
Eloi Devesa non formara parte do primeiro tramo da lista que encabezara no 2019 Manuel Anxo Fernández. Ademais disto hai que engadir que ningún dos que o acompañan en ese primeiro tramo estiveron tampouco hai catro anos polo que a renovación é total, a tres meses das eleccións.
A decisión foi tomada por unanimidade da Asemblea Local e con ampla participación da militancia. No lugar, Devesa agradeceu a todas e todos o apoio recibido e a confianza amosada e afirmou sentirse moi orgulloso de pertencer á organización. Ademais, dedicou unhas palabras de agradecemento e os mellores desexos para a anterior candidata, que non asistiu.
Eloi Devesa é carteiro de profesión, licenciado en historia da arte e cun master en profesorado. Vive en Lucí onde hai uns días encargouse de organizar unha asemblea cos veciños pola polémica en torno ao uso que o concello quere dar a casa común. Esta reunión a convocou, segundo algunhas fontes, a título particular e non como político.
Devesa indicou estar seguro de que o BNG de Teo estará á altura do momento porque conta con “un equipo unido, forte, comprometido, capaz de afrontar as vicisitudes con naturalidade, con ganas de avanzar e ilusións para traballar”. Engadiu tamén que o proxecto segue adiante e a Asemblea continúa traballando con total normalidade, realizando o calendario previsto e as actividades programadas. Devesa estará acompañado na lista por Noelia Castaño de Reis, Oscar Antón Pérez e Almudena Taboada de Cacheiras, Marcelino Rey dos Tilos, Daria Segade de Calo e Irene Tato de Rarís.
